Memleket basshysy Qasym-Jomart Toqaevtyń eldegi epidemiologiialyq jaǵdaidy turaqtandyrý tapsyrmasy oryndaldy. Bul týraly QR Densaýlyq saqtaý ministri Ajar Ǵiniiat aitty, dep habarlaidy QazAqparat.
«Memleket basshysy eldegi epidemiologiialyq jaǵdaidy turaqtandyrýǵa baǵyttalǵan birqatar tapsyrma bergen bolatyn. Búgingi tańda tapsyrma oryndaldy. Qazirgi ýaqytta elimizdiń barlyq óńirinde epidemiologiialyq jaǵdai turaqtandy. Táýligine koronavirýs infektsiiasymen shamamen onshaqty jaǵdaiy tirkeledi, naýqastardyń 98 paiyzdan astamy saýyǵyp ketip jatyr», - dedi ministr Ortalyq kommýnikatsiialar qyzmetinde ótip jatqan baspasóz máslihatynda.
Onyń atap ótýinshe, osy jyldyń 24 qańtarynda ótken vedomstvoaralyq komissiianyń otyrysynda karantindik is-sharalardy jeńildetý tásilderi qaralyp, maquldanǵan.
«Qazir elde barlyq shekteý is-sharalary alynyp tastaldy. Dúniejúzilik densaýlyq saqtaý uiymynyń málimetteri boiynsha sońǵy aptada búkil álemde aýrý 12 paiyzǵa tómendedi. Biraq aýrýdyń ósýi Amerika jáne Afrika óńirlerinde baiqalady. Sonymen qatar, álemniń 97 elinde syrqattanýshylyqtyń ósýi kórinip otyr», - dedi ol.
Ministrdiń dereginshe, sońǵy aptada Armeniiada syrqattanýshylyq - 200, Vengriiada - 200 paiyzdan astamǵa, Birikken Arab Ámirliginde - 55, Japoniiada - 54, Singapýrda - 37, Izrailde - 15, Túrkiiada 12 paiyzǵa ósken.
«Epidemiologiialyq jaǵdaidy kúndelikti boljaý jáne baǵalaý turaqty negizde jalǵasýda, jaǵdai ýshyqqan kezde KVI-men aýyratyn naýqastarǵa meditsinalyq kómek kórsetý úshin tósek oryndar, infektsiialyq aýrýhanalar, emdeýge arnalǵan qarajattyń kólemi, dárilik zattar men meditsinalyq buiymdar, jeke qorǵanys quraldary daiyn», - dedi Ajar Ǵiniiat.
