Prezidenttiń bir jylda atqarǵan jumysynyń qorytyndysy tórt tom bolyp jaryq kórdi. Bul týraly Memleket basshysynyń baspasóz hatshysy Berik Ýáli Facebook paraqshasynda jazdy, dep habarlaidy "Ult aqparat".
Qazaqstan Prezidenti Qasym-Jomart Kemeluly Toqaevtyń eldi basqarý tizginin qolyna alyp, prezidenttik qyzmetine kiriskenine búgin týra 1 jyl toldy.
«Qasym-Jomart Kemeluly jýyrda tvit-paraqshasynda: «Bir jyl buryn asa kórnekti memleket qairatkeri, jahandyq deńgeidegi saiasatker N.Nazarbaevtan el tizginin qolǵa alý mártebesi buiyrdy. Memleketimizdiń negizin qalaýshy – Elbasy strategiiasynyń sabaqtastyǵyn júzege asyrý úshin kóp jumys atqaryldy...» dep jazdy. Rasynda sol tarihi kezeńdegi Elbasynyń tańdaýynan keiin, kóp uzamai ótken sailaý qorytyndysy boiynsha Qazaqstan halqynyń basym bóligi (70,96%) Qasym-Jomart Kemelulynyń kandidatýrasyna qoldaý bildirip, daýys berdi. Qasym-Jomart Kemelulynyń sol 2019 jyldyń 20 naýryzynan beri qabyldaǵan sheshimderi, ótkizgen kezdesýleri men qabyldaýlary, jalpy atqarǵan jumystary túgeldei buqaralyq aqparat quraldarynda jariialanyp otyrdy», - dep jazady Berik Ýáli.
Esterińizde bolsa, Qasym-Jomart Kemeluly óziniń sailaýaldy baǵdarlamasyn «SABAQTASTYQ. ÁDILDIK. ÓRLEÝ» dep atap, óziniń negizgi úsh ustanymyn jariialaǵan bolatyn. Osy basty qaǵidattardy ustanǵan QR Prezidentiniń baspasóz qyzmeti Memleket basshysynyń osy ýaqyt aralyǵynda ártúrli deńgeidegi minberlerden sóilegen sózderin jinaqtap, 1 jyldyq jumystyń qorytyndysy retinde «SABAQTASTYQ. ÁDILDIK. ÓRLEÝ» degen atpen 4 tomdyq jinaq shyǵaryp otyr.
Bul kitaptarda Memleket basshysynyń ártúrli is-sharalarda sóilegen 76 sóziniń tolyq mátini jinaqtaldy.
Birinshi kitapqa Qasym-Jomart Toqaevtyń elimizdi damyǵan elderdiń qataryna qosý maqsatymen qolǵa alǵan bastamalary jáne halyqtyń jarqyn bolashaǵy úshin júzege asyrylatyn jobalar týraly oi-pikirleri, memlekettiń aldynda turǵan basym baǵyttary men mindetterin aiqyndaýǵa arnalǵan jalpyulttyq is-sharalarda sóilegen sózderi engizildi.
Ekinshi kitapqa Memleket basshysynyń óńirlerdegi jurtshylyqpen kezdesý ótkizip, el men jerdiń taǵdyry, saiasi ózgerister, ekonomikadaǵy serpin, áleýmettik jaýapkershilik jáne basqa da qoǵam ómiri týraly oi-tolǵamdary, elimizdiń aldynda turǵan basym baǵyttar men mindetter jóninde sóilegen sózderi toptastyryldy.
Úshinshi kitapqa Qazaqstan Prezidentiniń shet memleketterdiń basshylarymen kezdesýlerde, álemdik sammitter men halyqaralyq forýmdarda sóilegen sózderi júielenip toptastyryldy. Qasym-Jomart Kemeluly Qazaqstan Prezidenti qyzmetine kiriskennen keiin birneshe aidyń ishinde Resei, Qytai, AQSh jáne Eýraziianyń basqa da kóptegen eliniń kóshbasshylarymen bailanys ornatyp, shet elderge birneshe memlekettik, resmi jáne jumys saparyn jasady. Birikken Ulttar Uiymy, Táýelsiz Memleketter Dostastyǵy, Shanhai Yntymaqtastyq Uiymy, Aziiadaǵy ózara is-qimyl jáne senim sharalary jónindegi keńes, Eýraziialyq ekonomikalyq odaq, Ujymdyq qaýipsizdik shart uiymynyń sammitterine qatysty. Atalǵan jiyndarda halyqaralyq saiasattaǵy Qazaqstannyń orny, ustanymy týraly málimdemeler jasady.
Tórtinshi kitapqa Qazaqstan Prezidentiniń bir jyl ishindegi otandyq jáne sheteldik buqaralyq aqparat quraldarynda jariialanǵan maqalalary men suhbattarynda, BAQ ókilderi úshin ótkizgen brifingterde elimizdiń shet memlekettermen arasyndaǵy bailanystarǵa, halyqaralyq jáne ishki saiasi máselelerge qatysty aitqan oi-tolǵamdary endi. Sondai-aq, kitaptyń sońynda 8 suhbat pen 2 derekti filmniń videonusqasy flesh-kartaǵa júktelip, qosa berilip otyr.
«Mine, QR Prezidentiniń baspasóz qyzmeti Memleket basshysynyń bir jylǵy atqarǵan jumysynyń jalpy qorytyndysy retinde osy 4 tomdyqty qalyń buqaraǵa usynyp otyr. Kitap saiasattanýshylardyń, jýrnalisterdiń, zertteýshilerdiń jáne jalpy, kez kelgen izdenýshi azamattyń talǵamyna sai keledi degen úmittemiz», - dep túiindeidi sózin Prezidenttiń baspasóz hatshysy.
.jpeg)