Aqordanyń resmi saity Qazaqstan Prezidenti Ákimshiligi basshysynyń orynbasary E.Jienbaevtyń Konstitýtsiiaǵa engizilgen túzetýlerge qatysty túsindirmesin jariialady.
***
Biylǵy 1 qyrkúiekte Memleket basshysy Qasym-Jomart Toqaev Qazaqstan halqyna Joldaýyn jariialaǵanyn bilesizder.
Ondaǵy mańyzdy saiasi bastamalardyń biri – Prezidenttiń mandatyn qaita sailaný quqyǵynsyz jeti jyldyq bir merzimmen shekteý.
Májilis depýtattary osyǵan qatysty túzetýlerdi Konstitýtsiiaǵa engizý máselesin jedeldetýdi usyndy.
Olardyń paiymdaýynsha, jańa normalardy prezident sailaýyna deiin qabyldaǵan jón. Áitpese, Konstitýtsiianyń qazirgi erejeleri boiynsha osy kúzde Prezident bolyp sailanatyn adamǵa jeti jyldyq merzimge qaita sailanýǵa múmkindik beretin zańdy jaǵdailar týyndaýy múmkin.
Memleket basshysynyń bastamalaryn júzege asyrý úshin Konstitýtsiiaǵa túzetýler engizý qajet. Osyǵan bailanysty, Májilis depýtattarynyń usynysymen tiisti Zań jobasy ázirlendi.
Zań jobasynda Prezident ókilettiginiń jeti jyldyq merzimi týraly jáne onyń bir retten artyq sailana almaityny jónindegi normalardy keiin ózgertýge jol bermeitin ereje engizý de kózdelgen.
Bir adamnyń bir ret qana sailanatyny týraly norma Konstitýtsiiaǵa engiziletin túzetý kúshine engennen keiingi prezident sailaýynda Memleket basshysy bolyp sailanatyn adamdarǵa qoldanylatyn bolady.
Konstitýtsiiaǵa túzetýler aldaǵy sailaýǵa jáne Prezident jeti jyldyq merzimge sailanǵanǵa deiin qabyldansa, osy joly Prezident atanatyn azamat úshin jáne odan keiingi barlyq Memleket basshylary úshin prezident sailaýyna qaita qatysý múmkindigi zańmen shekteledi.
Prezident ókilettiginiń jeti jyldyq merzimi belgilenýine bailanysty osy zań jobasynda Konstitýtsiialyq Sot sýdialarynyń qyzmet merzimin alty jyldan segiz jylǵa uzartý usynyldy. Olar da bul laýazymǵa qaita taǵaiyndalmaityn bolady.
Álemniń kóptegen memleketterinde Konstitýtsiialyq Sot sýdialarynyń ókilettik merzimi olardy taǵaiyndaityn tulǵalardyń, iaǵni Prezidenttiń jáne Parlament depýtattarynyń ókilettik merziminen uzaǵyraq bolady.
Konstitýtsiialyq Sot sýdialarynyń ókilettik merzimi olardyń túrli saiasi kúshterdiń yqpalynan táýelsiz bolýyna basty kepildik bolyp sanalady.
Konstitýtsiialyq Sot 2023 jylǵy 1 qańtardan bastap jumys istei bastaidy. Sondyqtan, onyń sýdialarynyń ókilettik merzimin ulǵaitý týraly sheshimdi qazirden-aq qabyldaǵan mańyzdy bolmaq.
Ata zańymyzdyń 91-babynyń 3-tarmaǵyna sáikes zań jobasy Konstitýtsiialyq Keńeske joldandy.
Keńes Negizgi zańǵa engizilgeli otyrǵan túzetýlerdiń Konstitýtsiianyń 91-babynyń 2-tarmaǵynda belgilengen talaptarǵa sáikestigine qorytyndy beredi.
