Parlament Senatynyń tóraǵasy Qasym-Jomart Toqaev Qazaqstan Prezidentiniń mazmundy bastamalaryn keibir memlekettik qurylymdar qysqa merzimdi naýqanǵa ainaldyryp jibergenin aitty, dep habarlaidy "Ult aqparat".
«Álemdik sarapshylardyń baǵalaýy boiynsha Qazaqstanda jalpyulttyq jáne jahandyq mindetterdi júzege asyrýǵa qabiletti, shyǵarmashylyq oilaý áleýeti joǵary, aldyna biik maqsattar qoia biletin jastar az emes. Bizdiń, parlamentshilerdiń aldynda turǵan mindet - osyndai daryndy jastarǵa qajetti quqyqtyq jaǵdai jasaý. Jastar jylynyń mán-mańyzy da osynda. Kezinde Prezident Jalpyǵa ortaq Eńbek qoǵamyn qurý jóninde tapsyrma bergen bolatyn. Mazmuny óte salmaqty mańyzdy bastamany tiisti memlekettik qurylymdar uranshyldyqqa salyp, qysqa merzimdi naýqanǵa ainaldyryp jibergenin moiyndaý qajet. Shyn máninde, biz jalpyǵa ortaq eńbek qoǵamy ideiasyn alǵa tarta otyryp, barsha halyqtyń, sonyń ishinde jastardyń ulttyq oi-sanasy men minez-qulqyn túbegeili qaita qaraý máselesine nazar aýdarýymyz qajet», - dep toqtaldy Qasym-Jomart Toqaev Jastar jylyn ótkizý aiasynda turǵan maqsattarǵa arnalǵan dóńgelek ústel otyrysynda.
Onyń atap ótýinshe, jańa ǵasyrda bizdiń aldymyzda tereń oily, eńbekqor, syndarly, tózimdi, utqyr jáne jańashyldyqqa umtylǵan ulttyń jańa beinesin, demek, básekege qabiletti ult iesin qalyptastyrý mindeti tur. Joǵary oqý oryndaryndaǵy baǵdarlamalardyń mazmuny jastardy dál osy zamanaýi qasietterge baýlýy tiis. Osy oraida, otandyq joǵary bilim berý júiesiniń kóshin bastap turǵan - Nazarbaev Ýniversiteti elimizdegi bilim ordalaryna baǵdar bere alatynyn eskerý qajet.
«Elbasy usynǵan «Rýhani jańǵyrý» baǵdarlamasy, eń aldymen, jastardyń maqsat-múddesin kózdeitin biregei joba. Bul qoǵamdy jahandyq órkeniettiń teńdessiz jetistikterimen tanystyratyn, jańa qundylyqtarǵa, atap aitqanda, syndarly kózqaras pen eńbekke degen súiispenshilikke tárbieleitin keń aýqymdy baǵdarlama. Alaida, biz halqymyzdyń rýhani murasyna adal bolyp, ótkenniń sabaqtaryn umytpaýymyz qajet. Prezidenttiń «Uly dalanyń jeti qyry» maqalasy da - jastardy ulttyq qundylyqtarǵa baýlityn óte keremet týyndy. Memleket basshysynyń maqalasy jas urpaqty ata-babalarymyz mura etken jetistiktermen tanystyratyn qundy dúnie», - dedi Senat spikeri.
