Foto: akorda.kz
Memlekettik keńesshi Erlan Qarin Prezidenttiń 2021 jylǵy Joldaýyn júzege asyrýdyń aralyq qorytyndysyn shyǵardy, - dep habarlaidy Tengrinews.kz tilshisi.
Erlan Qarinniń aitýynsha, erteń, 1 qyrkúiekte Memleket basshysy elimizdiń taiaý bolashaqqa arnalǵan áleýmettik-ekonomikalyq damýynyń negizgi basymdyqtaryn belgileitin kezekti Joldaýyn jariialaidy.
"Sarapshylar onyń yqtimal mazmunyn talqylap, boljamdarymen bólisip jatqanda, 2021 jylǵy "Halyq birligi jáne júieli reformalar – el órkendeýiniń berik negizi" Joldaýyn iske asyrýdyń aralyq qorytyndylaryn shyǵaraiyq.
Barlyq praktikalyq jumys arnaiy Ult jospary aiasynda júrgizilip jatyr. Ol 103 pýnktten turady, olardyń basym bóligi oryndaldy, qalǵandarynyń oryndalýy Prezident Ákimshiliginiń baqylaýynda", - dedi memlekettik keńesshi.
Mańyzdy áleýmettik bastamalar ishinde Qarin 2022-2025 jyldar aralyǵynda azamattyq qyzmetshilerdiń jekelegen sanattarynyń (mádeniet uiymdarynyń, muraǵattardyń, onyń ishinde tehnikalyq qyzmetkerlerdiń jáne basqalardyń) jalaqysyn ortasha eseppen 20 paiyzǵa kezeń-kezeńimen arttyrýdy atap ótti.
"Sonymen qatar, zańnamaǵa eń tómengi jalaqyny 60 myń teńgege deiin kóterý jáne ony salyqtyq, áleýmettik jáne basqa salalardaǵy eseptik kórsetkish retinde alyp tastaý bóliginde ózgerister men tolyqtyrýlar engizildi. 2025 jyldyń aiaǵyna deiin keminde 1000 mektep salýdyń jol kartasy bekitildi. Turǵyn úi máselesin sheshý úshin "Nurly jer" baǵdarlamasy boiynsha "Otbasy bank" arqyly jalpy somasy 230 milliard teńgege jýyq 20 myńnan asa jeńildetilgen nesie berildi", - dep tolyqtyrdy ol.
Memlekettik keńesshi elimizde ult densaýlyǵyn jaqsartý baǵytynda naqty qadamdar jasalyp jatqanyna toqtaldy. Atap aitqanda, "Biologiialyq qaýipsizdik týraly" zań kúshine enip, turǵyndarǵa DDSU-da tirkelgen koronavirýs infektsiiasyna qarsy vaktsinalardyń qoljetimdiligi qamtamasyz etildi.
"Saiasi jańǵyrtý jáne adam quqyqtaryn qorǵaý blogy tolyǵymen derlik júzege asyryldy. Adam quqyqtaryn qorǵaý júiesin nyǵaitý jáne zańnyń ústemdigin qamtamasyz etý úshin prokýrorlardyń erekshe qylmystyq ister boiynsha aiyptaý qorytyndysyn daiyndaý bóliginde quzyreti keńeitildi. Ýákiletti organdar alaiaqtyqpen jáne piramida shemalarymen kúresý boiynsha 2022 jylǵa arnalǵan birlesken is-sharalar keshenin júzege asyryp jatyr.
Zań shyǵarý jumystarynyń sheńberinde bilim berý salasynda, stresstik aktivter naryǵyn damytý týraly jáne t.b. zańdar qabyldandy. Sonymen qatar, Qazaqstan Respýblikasynyń 2025 jylǵa deiingi aýmaqtyq damý jospary, 2022-2026 jyldarǵa arnalǵan sybailas jemqorlyqqa qarsy saiasat tujyrymdamasy bekitildi", - dedi Erlan Qarin.
Bul, memlekettik keńesshiniń aitýynsha, Prezidenttiń 2021 jylǵy Joldaýy aiasynda jariialaǵan júzege asyrylǵan eleýli bastamalarynyń az ǵana bóligi.
"Bul baǵyttaǵy jumystar jalǵasady. Jalpy, Memleket basshysy alǵa qoiǵan barlyq bastama dáiekti túrde júzege asyp jatqanyn jáne azamattardyń ómir súrý sapasyn jaqsartýǵa jáne elimizdiń turaqty damýyna tikelei áser etetinin atap ótken jón. Osylaisha, júzege asyrylǵan bastamalar aldaǵy reformalarǵa negiz bolady", - dep túiindedi ol.
