«Qazmedia ortalyǵynda» Qazaqstan Respýblikasy Prezidentiniń buqaralyq aqparat quraldary salasyndaǵy syilyqtary men granttaryn tabystaý rásimi ótti, dep habarlaidy "Ult aqparat" Aqordaǵa silteme jasap.
Saltanatty is-shara barysynda Prezident Ákimshiligi Basshysynyń birinshi orynbasary Dáýren Abaev Memleket basshysy Qasym-Jomart Toqaevtyń BAQ qyzmetkerleriniń kásibi merekesine arnalǵan quttyqtaýyn oqydy.
– Sizder qashanda ult múddesin bárinen biik qoiyp, el qamy úshin qalam tartyp júrsizder. Memleketshildik qundylyqty dáriptep, jasampazdyq pen jaqsylyqtyń jarshysy bolyp kelesizder.Aqparat salasyn damytýǵa memleket tarapynan qashanda erekshe kóńil bólinedi. Óz kásibiniń maitalmany bolǵan qarymdy jýrnalisterge qoldaý kórsetiledi. BAQ salasyndaǵy dástúrli Prezident syilyǵy – sonyń bir kórinisi. Onyń iegeri atanǵan azamattardyń esimi qazaq jýrnalistikasynyń jylnamasyna jazylatyny sózsiz. Jyl saiyn eń tańdaýly jýrnalisterge beriletin marapat osymen jiyrma besinshi ret tabystalyp otyr. Bul syilyqqa qasterli Táýelsizdigimizdiń 30 jyldyǵy qarsańynda ie bolýdyń da simvoldyq máni bar, – delingen Prezidenttiń quttyqtaýynda.
Sodan keiin Dáýren Abaev Prezident syilyǵy men grantynyń iegerlerin, Alǵysyn alǵan shyǵarmashylyq ujymdardy quttyqtady.
Memleket basshysynyń Ókimimen Qazaqstan Respýblikasy Prezidentiniń syilyǵy ««Habar 24» telearnasynyń jańalyqtar bóliminiń júrgizýshisi Zaharchýk Vera Nikolaevnaǵa, «Qmonitor.kz» jelilik basylymynyń sholýshysy Isabaeva Sáýle Borisqyzyna, «Qazaq» jáne «Shalqar» radiolarynyń Almaty stýdiiasynyń jetekshisi Qutpanbaev Baqyt Jaǵyparulyna, «Qazaqstan temir joly» ulttyq kompaniiasy» aktsionerlik qoǵamynyń BAQ-pen jumys departamentiniń bas menedjeri Oishybaeva Jannat Baqtyǵulqyzyna berildi.
Prezident granttaryn «AIQYN» respýblikalyq qoǵamdyq-saiasi gazetiniń bas redaktory Baiǵaraev Nurmuhamed Ismanuly, «KTK» telearnasynyń aqparattyq baǵdarlamalar direktsiiasy ortalyq redaktsiiasynyń redaktory Nuraqyn Dias Ermekuly, «QAZAQSTAN» ulttyq telearnasy «Ashyq alań» qoǵamdyq-saiasi tok-shoýynyń júrgizýshisi Tolyqbaev Maqsat Málikuly, «Munara» gazetiniń bas redaktory Hasanov Serikbol Tilepbergenuly ielendi.
Qazaqstan Respýblikasy Prezidentiniń Alǵysy «Aqiqat» ulttyq qoǵamdyq-saiasi jýrnalynyń, «Vechernii Almaty» gazetiniń, «Qazaq radiolary» jaýapkershiligi shekteýli seriktestiginiń, «Saryarqa» telearnasynyń shyǵarmashylyq ujymdaryna tabystaldy.
Memleket basshysynyń Alǵys hattary elimizdiń barlyq óńirine jiberildi. Atalǵan marapattar ár aimaqtan úzdik dep tanylǵan jýrnalisterge saltanatty túrde tabys etiledi.
