Bul bastama - adamdardyń ómir súrý quqyǵy, sóz bostandyǵy, densaýlyǵyna degen quqyǵy. Onyń barlyǵy sóz júzinde qalyp qoimaýy kerek.
Bul týraly «Shańyraq» múgedektigi bar áielder qaýymdastyǵy» qoǵamdyq birlestiginiń tóraiymy Lázzat Qaltaeva tildesý kezinde aitty, dep habarlaidy Baq.kz agenttigi.
Keshe QR Prezidenti Qasym-Jomart Toqaev óziniń Twitter-degi paraqshasynda adam quqyqtary salasyndaǵy naqty sharalardy odan ári júzege asyrý – saiasi jańǵyrýdyń mańyzdy kezeńi ekenin jazyp, bul turǵyda Úkimetke birqatar tapsyrma bergenin málimdedi. Onda adam saýdasy qurbandarynyń quqyǵyn qamtamasyz etý, áielderge qatysty kemsitýdi joiý, pikir bildirý bostandyǵy, múgedektigi bar azamattardyń quqyqtaryn qorǵaý siiaqty baǵyttar qamtylǵan.
Elimizdegi Úkimettik emes uiymdar Prezidenttiń bul bastamasyn oń qabyldap, onyń jumys isteýine óz úlesterin qosatyndaryn bildirdi.
Lázzat Qaltaeva Adam quqyqtary týraly zań bazasynda birneshe dáreje qamtylǵanyn aitady. Iaǵni, onda kópbalaly ana, immigrant áielder, múgedektigi bar áielderdiń quqyǵy jáne taǵy basqa dep kete beredi.
Degenmen munyń barlyǵy - ómir súrýge degen quqyq, sóz bostandyǵy densaýlyq quqyǵy jáne basqasy. Osylardyń barlyǵy sóz júzinde qalmai, iske asý kerek. Bul zańnyń jumys isteitin mehanizmi bolýy qajet. Onyń zańdy turǵyda ókilettiligi, ony iske asyrý úshin óz biýdjeti bolǵany jón. Adamdarda quqyqqorǵaýshylarǵa júginetindei jaǵdai bolýy kerek. Prezidenttiń keshegi jarlyǵy adam quqyǵy salasyndaǵy naqty sharalardy júzege asyrýǵa arnalǵan, onyń ózi qýantarlyq jaǵdai. Aldaǵy ýaqytta bul másele boiynsha kóptegen talqylaý ótedi degen oidamyn, ol kezde óz tarapymyzdan usynystar aitamyz, - deidi qoǵamdyq birlestiktiń tóraiymy.
Onyń aitýynsha, qazir múgedektigi bar áielderdiń quqyǵy buzylǵanda, olar kóbinde prokýratýraǵa, ÚEU-ǵa, adam quqyǵy jónindegi quzyrly organdarǵa júginedi eken.
Turmystyq janjal kezinde áielder qaida júginerin bilmeidi. Kóbinde olar óz quqyǵyn qorǵai almaidy. Sondyqtan bul turǵyda da másele kóp. Elimizdiń kez kelgen turǵyny zorlyq-zombylyqtan qorǵalýy kerek, - deidi Qaltaeva.
