Búgin QR Ortalyq sailaý komissiiasy 20 qarashada ótetin kezekten tys Prezident sailaýyna kandidattardyń memlekettik tildi erkin meńgergenin anyqtaityn komissiia qurý týraly qaýly qabyldady, dep habarlaidy QazAqparat.
«Qazaqstan prezidenttigine kandidattyń memlekettik tildi jetik meńgerýi QR Konstitýtsiiasynyń 41-baby boiynsha lingvistikalyq komissiianyń qaýlysymen anyqtalady. OSK-nyń osy másele boiynsha quzyreti «QR-daǵy sailaý týraly» Konstitýtsiialyq zańnyń 54-baby 2-tarmaǵynda kórsetilgen.
Naqtyraq aitqanda, osy bapqa sáikes, Konstitýttsiianyń 41-babynyń 2-tarmaǵyn resmi túsindirý týraly Konstitýtsiialyq keńestiń sheshimi boiynsha memlekettik tildi bilýdegi kandidattyń biliktiligin anyqtaý Ortalyq sailaý komissiiasynyń sheshimimen aiqyndalady. QR Konstitýtsiiasynyń 41-baby 2-tarmaǵyn resmi túsindirý týraly Konstitýtsiialyq keńestiń 1998 jylǵy 9 qazandaǵy №280 qaýlysyna sáikes, QR Konstitýtsiiasynyń 41-baby 2-tarmaǵy normasynyń memlekettik tildi erkin meńgergen degen bóliginde «qazaq tilinde saýatty túrde oqidy, jazady, óz oiyn qinalmai ońai jetkizedi jáne kópshilik aldynda sóilei alady» dep aitylǵan», - dedi QR Ortalyq sailaý komissiiasynyń hatshysy Muhtar Erman OSK otyrysynda.
Onyń atap ótýinshe, úmitkerlerdiń memlekettik tildi erkin meńgergenin anyqtaý OSK-nyń qaýlysyna sáikes, quramy keminde 5 adamnan quralǵan mamandar kiretin lingvistikalyq komissiianyń qorytyndysymen aiqyndalady.
«OSK-nyń QR prezidenttigine kandidattyń memlekettik tildi erkin meńgergenin anyqtaý rásimi týraly 2005 jylǵy 31 tamyzdaǵy №12/26 arnaiy qaýlysy bar. Prezidenttikke úmitkerdiń memlekettik tildi erkin meńgergenin anyqtaý úshin birinshi - lingvistikalyq komissiia usynǵan taqyryp boiynsha kólemi 2 betten aspaityn jazbasha tapsyrma jazady. Ekinshi - lingvistikalyq komissiia usynǵan kólemi 3 betten aspaityn mátindi oqý. Úshinshi - lingvistkalyq komissiia usynǵan taqyryp boiynsha kópshilik aldynda 15 minýttan kem emes ýaqyt sóz sóileý talap etiledi», - dedi ol.
