Búgin Astanada QR Parlamenti Palatalarynyń birlesken otyrysy ótýde. Kún tártibinde «Qazaqstan Respýblikasynyń Konstitýtsiiasyna ózgerister men tolyqtyrýlar engizý» týraly Zań jobasy qarastyrylýda. Otyrysta sóz alǵan Májilis depýtaty Baqtyqoja Izmuxametov 41 bapqa qatysty pikir bildirdi, dep habarlady Baq.kz tilshisi.
"Konstitýtsiianyń 41 babynda El Prezidentiniń laýazymyna kandidattarǵa qoiylatyn biliktilik ólshemderiniń ishinde joǵary bilim jaiy eskerilmegeni múldem aqylǵa qonymsyz. Tipti memlekettik qyzmettiń eń tómengi satysy úshin de joǵarǵy bilim bolýy qaralǵan. Al eldi basqaratyn Prezidenttikke kandidat úshin bul qaralmaǵan", - deidi B.Izmuxametov.
Májilis depýtaty bolashaqta Prezident sailaýyna túsetin kandidattarda joǵary bilim bolý kerektigin aityp otyr.
"Sondyqtan Prezidenttikke kandidatqa qoiylatyn basty talaptar qatarynda – mindetti túrde joǵary biliminiń bolýyn Konstitýtsiiaǵa engizý qajet degen naqty usynys bar. Bul bolashaqta oryn alýy múmkin keleńsizdiktiń aldyn-alýdyń bir joly deýge bolady", - deidi depýtat.
