QR Memlekettik qyzmet isteri agenttiginiń tóraǵasy Anar Jaiylǵanova Prezidenttik jastar kadr rezervine engen qazaqstandyqtar týraly aityp berdi, dep habarlaidy QazAqparat.
«Memleket Basshysy Qasym-Jomart Toqaevtyń «Igilik barshaǵa! Sabaqtastyq. Ádildik. Órleý» sailaýaldy baǵdarlamasynda agenttiktiń aldyna Prezidenttik jastar kadr rezervin qalyptastyrý mindeti qoiyldy. Búgin biz Prezidenttik jastar kadr rezervine irikteýdiń aiaqtalǵanyn qýanyshpen habarlaimyz», - dedi Anar Jaiylǵanova QR Prezidenti janyndaǵy Ortalyq kommýnikatsiialar qyzmetinde ótken baspasóz máslihatynda.
Prezident bastamasyna alǵashynda 13 myńnan astam qazaqstandyq qatysýǵa niet bildirgen edi. Qatysýshylarǵa otyz bes jastan aspaǵan, joǵary bilimi jəne bes jyldan kem emes eńbek ótili bar Qazaqstan Respýblikasynyń azamaty bolýy tiis degen talaptar qoiyldy.
Qoiylǵan talaptarǵa sáikes iriktelgen 300 rezervshiniń barlyǵy 6 kezeńnen turatyn qatań irikteýden ótti.
«Jeńimpazdar arasynda jeke sektordyń 106 ókili, kvazimemlekettik sektordyń 98 qyzmetkeri jáne 96 memlekettik qyzmetker bar. Kandidattardyń 58% aldyńǵy qatarly sheteldik bilimi bar, 42% - qazaqstandyq JOO túlekteri. 6 adam ǵylym doktory, 204 adam - magistr dárejesine ie», - dedi Anar Jaiylǵanova.
Irikteý jeńimpazdarynyń ortasha jasy 31-di qurady. Sonymen birge, rezervshiler ekonomikanyń túrli salalarynda aitarlyqtai tájiribege ie. Olardyń kópshiligi ekonomikanyń túrli salalarynda iri sheteldik jáne transulttyq kompaniialarda jumys istegen nemese áli de jumys isteidi.
«Rezerv irikteýine shetelde júrgen qazaqstandyqtar da belsene qatysty. Qatysýshylar elimizdiń barlyq aimaqtarynan, sondai-aq jaqyn jáne alys shetelderden (Ázerbaijan, Ulybritaniia, Germaniia, Resei, Túrkiia jáne Frantsiia) keldi. Óńirler arasynda úmitkerlerdiń eń kóbi Almaty (46), Qaraǵandy (41) jáne Shyǵys Qazaqstan oblysynan (30) keldi», - dedi agenttik basshysy.
Ulttyq komissiianyń qaraýyna tańdalǵan úmitkerler qataryna túrli ult ókilderi bar, sonyń ishinde qazaqtar, orystar, ázerbaijandar, armiandar, nemister jáne tatarlar bar.
Aita keteiik, Prezidenttik jastar kadr rezervine engen 300 úzdik qazaqstandyqtar tizimin resmi saittan kórýge bolady.
