Atyraý oblysynyń ákimi Mahambet Dosmuhambetov koronavirýs infektsiiasyna qarsy kúreste aldyńǵy sapta júrgen meditsina qyzmetkerlerimen onlain suhbat ótkizip, olarǵa alǵys bildirdi, dep habarlaidy "Ult aqparat".
Onlain bailanysqa koronavirýs infektsiiasyn juqtyrǵandarmen tikelei jumys jasap jatqan oblystyq jedel járdem stantsiiasy men infektsiialyq bólimshe ornalasqan №2 oblystyq aýrýhananyń dárigerleri qosyldy.
«Qazir sizder shyn máninde myltyqsyz maidandasyzdar. Óitkeni, kúndelikti qaýip-qaterge qaramastan qajyrly jumys istep, búgingi kúnniń qaharmandaryna ainaldyńyzdar. Qazaqstan meditsinasynyń erlikke toly jańa tarihyn jazyp jatyrsyzdar. Halqymyz ózderińizge úmit artyp, amandyqtaryńyzdy tilep otyr. Bizdiń de basty mindetimiz – eń aldymen, sizderdi qoldaý», - dedi oblys ákimi Mahambet Dosmuhambetov.
Oblysta meditsina salasy mamandaryna ústemeaqy tóleý úshin 288,7 million teńge bólingen. Naýryz aiynda onyń 44,5 million teńgesi 373 qyzmetkerdiń qolyna tidi. Budan tys, koronavirýspen kúresip jatqan dárigerlerdi yntalandyrýdyń qosymsha joldary qarastyryldy. Atap aitqanda, demeýshiler tartyla otyryp, 634 mamanǵa kótermeleý qarjysy tólendi. Al, 164 dáriger jáne jedel járdem stantsiiasy qyzmetkerleri qonaqúilerge ornalastyryldy.
Tikelei suhbat barysynda №2 oblystyq aýrýhananyń dárigerleri naýqastardy emdeý joldary týraly baiandady. Máselen, infektsiialyq statsionarǵa 27 naýryzdan búginge deiin 123 naýqas qabyldanǵan. Onyń 59-y tolyq nátijeli emin alyp, aýrýhanadan shyǵaryldy. Al, jedel járdem stantsiiasy mamandarynyń aitýynsha, COVID-19 infektsiiasyn juqtyrǵandarmen jaqyn jáne yqtimal bailanysta bolǵan azamattardy tasymaldaýǵa 3 arnaiy brigada jasaqtalǵan. Sáýirde qosymsha 2 arnaiy brigada taǵy qosylǵan. Sonymen qatar, qorda bir ret qoldanylatyn maska, arnaiy qorǵanys kostiýmderi, qorǵanys kózildirigi jetkilikti. Densaýlyq saqtaý basqarmasy, demeýshiler, eriktiler qorǵanys kiimderimen únemi qamtamasyz etilýde.
«Densaýlyq saqtaý salasy únemi basty nazarymyzda bolady. Oblystaǵy árbir meditsina qyzmetkeriniń orny biz úshin erekshe. Bul indetti birge jeńetinimizge senemin. Otbasylaryńyzben tez qaýyshýlaryńyzdy tileimin» - dep oblys ákimi Mahambet Dosmuhambetov meditsina qyzmetkerlerine alǵysyn bildirdi.
