QR Memlekettik qyzmet isteri agenttiginiń tóraǵasy Anar Jaiylǵanova Prezidenttik kadr rezervshilerin jumysqa ornalastyrý týraly aityp berdi, dep habarlaidy "Ult aqparat".
«2019 jyly 300 adamnan quralǵan Prezidenttik jastar kadr rezervi quryldy. 2020 jyly olardyń 57 % nemese 171 rezervshi memlekettik organdar men kvazimemlekettik sektor kompaniialaryndaǵy túrli pozitsiialarǵa jumysqa ornalastyryldy. Basqa rezervshilerdi joǵary basqarýshylyq laýazymdarǵa taǵaiyndaý úshin olardyń mansaptyq satylardan ótýi arqyly jumys tájiribesi men quzyretterin odan ári jetildirýi qajet. Osyǵan bailanysty arnaiy ázirlengen baǵdarlamalar boiynsha turaqty oqytýdy kózdeitin rezervshilerdi damytýdyń jeke josparlary ázirlendi jáne bekitildi», - dedi Jaiylǵanova QR Memlekettik qyzmet isteri agenttiginiń Alqa otyrysynda.
Biyl da Memleket basshysy Prezidenttik kadr rezervine kezekti konkýrstyq irikteý júrgizýdi jáne oǵan jańa kózqarastar men bastamalary bar 50 kásibi menedjerdi qabyldaýdy tapsyrdy.
«Qazirgi ýaqytta Agenttik Prezidenttiń tiisti Jarlyǵy jobasyn daiyndap, ony jariia talqylaýǵa jáne múddeli memlekettik organdarmen kelisýge joldady. Osylaisha, aldyńǵy irikteý tájiribesin eskere otyryp, kandidattardyń qundylyq baǵdary boiynsha talaptar tujyrymdamalyq turǵydan qaita qaraldy. Atap aitqanda, rezerv qoǵamdyq múddelerge basymdyq beretin adamdar arasynan quralmaq. Rekrýting ózgertýler de naqty tájiribesi bar transformatsiialyq kóshbasshylardy anyqtaýǵa baǵyttalǵan. Osyǵan bailanysty rezerv kriteriileri qaita qaraldy», - dedi Jaiylǵanova.
Jumysqa ornalastyrýdy qamtamasyz etý úshin áleýetti jumys berýshiler qatarynan saraptamalyq komissiia qurylady.
