Prezidenttik kadr rezervine engen Lázzat Ádilova sheteldegi jumystan bas tartyp, Aqtóbege oraldy. Elimizdegi eń bilimdi 300 jastyń qataryna qosylǵan maman bolashaqta memlekettik qyzmetker bolýdy maqsat etip otyr, dep habarlaidy QazAqparat.
Lázzat Ádilova Prezident bastamasy munai-gaz salasynda eńbek etip júrgen jas mamandarǵa jarqyn maqsattaryn iske asyrýǵa jol ashty dep esepteidi.
«Prezidenttik jastar kadr rezervi Memleket basshysynyń sailaýaldy bastamasynda mindet etip qoiyldy. Eń daryndy, bilimdi 300 jas tańdaldy. Bolashaqta bul jastar memlekettik qyzmettiń tiimdiligin arttyrýdy maqsat etip otyr. Men halyqqa qyzmet etip, jaǵdaiyn kóterý, óz bilimim men tájiribemdi el igiligine baǵyttaýdy kózdeimin. Kadrlyq rezerv jasaqtalǵanda ashyq ári obektivti jeti kezeńnen óttik. Árqaisysynyń óz artyqshylyǵy men jaýapkershiligi zor. Qańtar aiynda Prezidentpen kezdesý boldy. Sol kezde tapsyrma berip, naqty aitty. Bizge el úlken úmit artyp otyr. Qazir men munai kompaniiasynda eńbek etip júrmin. Bas menedjermin. Qazaq tilinen ózge orys, qytai, aǵylshyn tilinde erkin sóilei alamyn. Qytai tilinde magistratýra bitirdim. Birden Qytaida halyqaralyq uiymdar jumysqa shaqyrdy. Biraq men Qazaqstanǵa oralyp, eńbek etýge sheshim qabyldadym», - dedi Lázzat Ádilova.
Investitsiia tartý, munai-gaz salasyndaǵy infraqurylym baǵytyn damytyp júrgen maman bolashaqta halyqaralyq qatynastar baǵytynda jumys isteýdi armandaidy. Memlekettik qyzmetke aýysyp, jańa bastamalarymen el damýyna yqpal etpek.
«Bárimiz de qarapaiym qazaq balasymyz. Máselen, meniń ákem - temirjolshy, anam - dáriger. Uzaq jyldan beri bir salada eńbek etip júr. Prezidenttik kadr rezervine jinalǵan jastardyń bilimi joǵary, keibiri shetelde júrip jańa tehnologiiany meńgergen. Jinalǵan adamdardyń kózqarasy ózgeshe, kóp biledi. Biraq bári qarapaiym, el úshin, erteńimiz úshin eńbek etemiz dep ortaq múddege toǵysty», - dedi Lázzat Ádilova.
Eske salsaq, Prezident Qasym – Jomart Toqaev «Júzden - júirik, myńnan - tulpar» shyqqan jastarmen kezdesýinde el damýynyń baǵytyn túsindirip berdi. Prezidenttik kadr rezervine barlyǵy 13 myńnan astam ótinish tússe, olardyń tek 300-i irikteldi.
.jpeg)