QR Prezidenti Qasym-Jomart Toqaevtyń ant berý kúni 2019 jylǵy 12 maýsymǵa belgilendi. Bul týraly QR Ortalyq sailaý komissiiasy málim etti, dep habarlaidy "Ult aqparat".
QR OSK múshesi Lázzat Súleimen Respýblika Prezidenti bolyp daýys berýge qatysqan sailaýshylardyń 50 paiyzynan artyq daýys alǵan kandidat tanylatynyn atap ótti.
«Qaýly jobasyna sáikes, «Qazaqstan Respýblikasyndaǵy sailaý týraly» Konstitýtsiialyq Zańynyń, sonymen qatar 9 maýsym kúni ótken daýys berýde aýmaqtyq sailaý komssiialarynyń daýystardy sanaýdyń nátijeleri týraly hattamalarynyń negizinde Qasym-Jomart Kemeluly Toqaev Qazaqstan Respýblikasynyń sailanǵan Prezidenti bolyp tanylsyn. Q.Toqaev kandidatýrasy úshin sailaýshylardyń 6 539 715-i daýys berdi», -dedi ol.
Aita keteiik, zańnamaǵa sáikes, Ortalyq sailaý komissiiasy aýmaqtyq sailaý komissiialary hattamalarynyń negizinde sailanǵan Prezidentti tirkeidi.
«Qazaqstan Respýblikasynyń Prezidenti týraly» Konstitýtsiialyq Zańǵa sáikes, Ortalyq sailaý komissiiasynyń tóraǵasy sailanǵan Prezidentke Qazaqstan Respýblikasy Prezidentiniń kýáligin tapsyrady. Konstitýtsiialyq Zańnyń osy normasyn basshylyqqa ala otyryp, 9 maýsym kúni sailanǵan Qasym-Jomart Toqaevqa Qazaqstan Respýblikasy Prezidentiniń kýáligin tapsyrý usynylady. Sonymen qatar, zańǵa sáikes, Prezident kezekten tys sailaýda sailanǵan jaǵdaida ant berý kúnin Ortalyq sailaý komissiiasy anyqtaidy. Osy zańnama normasyna súiene otyryp, Qasym-Jomart Toqaevtyń ant berý kúni 2019 jylǵy 12 maýsym bolyp aiqyndalsyn», - dedi Súleimen.
Atap aitqanda, QR OSK-nyń ashyq otyrysynda 2019 jylǵy 9 maýsymda bolǵan Qazaqstan Respýblikasy Prezidentiniń kezekten tys sailaýynyń qorytyndylaryn anyqtaý týraly qaýly qabyldandy.
