Foto: Reuters.com
Prezident Qasym-Jomart Toqaev qańtar oqiǵasyna elimizdegi yqpaldy adamdardyń qatysy baryn málimdedi, - dep habarlaidy Tengrinews.kz tilshisi.
Toqaev qazir qańtar oqiǵasyna qatysty aldyn ala qorytyndylar daiyn ekenin aitty.
"Biz teris piǵyldy adamdardyń tóńkeris jasamaq bolǵanyn naqty bilemiz. Osy rette búlikshiler nege mundai qadamǵa bardy degen suraq týyndaidy. Jaýaby aidan anyq. Sońǵy jyldary biz Qazaqstandy túbegeili jańǵyrtýǵa, transformatsiialaýǵa kóshtik. Túrli salada aýqymdy ózgerister bastaldy. Bul keibir yqpaldy adamdarǵa unamady. Olar jyldar boiǵy zańsyz áreketterin odan ary jalǵastyra berýdi kózdedi. Neǵurlym joǵary bilikke ie bolýdy kózdedi. Sol úshin kánigi qylmyskerler qarýly bandalar men opasyz sheneýnikter birigip astyrtyn top qurdy. Ishki jáne syrtqy jaýlarymyz ózara ymyralasyp, bilikti basyp alǵysy keldi. Olar halyqtyń narazylyq sherýin basqa arnaǵa buryp, jurtty qasaqana arandatty.
Bilikke kúie jaǵý úshin beibit turǵyndarǵa oq atty. Osynyń bárin sheteldegi radikal kúshter óz maqsatyna paidalanǵysy keldi. Olar Qazaqstandy qaqtyǵys aimaǵyna ainaldyryp, elde oiran salmaq boldy. Prezidentti bilikten ketirgisi keldi.
Tóńkeris jasaýǵa umtylǵandardyń arasynda belgili adamdar boldy. Joǵary laýazym ieleri memleketke satqyndyq jasady. Olar kúshtik qurylymdardyń zańǵa sáikes qimyldaýyna kedergi keltirdi. Memleket basshylyǵyna qalalardaǵy ahýal týraly jalǵan aqparat berdi", - dedi Prezident Parlament palatalarynyń birlesken otyrysynda.
