Parlament Senatynyń jalpy otyrysynda qabyldanǵan «Qazaqstan Respýblikasynyń ákimshilik-aýmaqtyq qurylysy týraly» QR Zańyna ózgerister men tolyqtyrýlar engizý týraly» Zańy aiasynda Prezidentke jańa ókilettik berilgen, dep habarlaidy "Ult aqparat".
Senattyń Ekonomikalyq saiasat, innovatsiialyq damý jáne kásipkerlik komitetiniń málimetinshe, zań jobasynyń maqsaty – Qazaqstan Respýblikasynyń ákimshilik-aýmaqtyq qurylysy salasyndaǵy zańnamasyn jetildirý.
Zań jobasymen «Qazaqstan Respýblikasynyń ákimshilik-aýmaqtyq qurylysy týraly» QR Zańyna mynadai túzetýler engiziledi:
- qaladaǵy aýdandardy eldi mekenderdiń quramdyq bólikterine jatqyzý;
- oblystyq mańyzy bar qaladaǵy, respýblikalyq mańyzy bar qaladaǵy, astanadaǵy halyq sany 400 myń adamnan astam bolǵan kezde, olarda aýdan qurý;
- aýdandyq mańyzy bar qalanyń, kenttiń jáne aýyldyń ólshemsharttaryn naqtylaý;
- QR Prezidentine QR Úkimetiniń usynýy boiynsha jáne jergilikti ókildi jáne atqarýshy organdardyń pikirin eskere otyryp, respýblikalyq, oblystyq jáne aýdandyq mańyzy bar qalalardy ózge eldi mekender etip qaita qurý týraly sheshim qabyldaý boiynsha ókilettik berý;
- Qazaqstan Respýblikasynyń Úkimetine Qazaqstan Respýblikasynyń Prezidentine respýblikalyq, oblystyq jáne aýdandyq mańyzy bar qalalardy ózge eldi mekender etip qaita qurý týraly usynym engizý boiynsha jańa quzyret berý;
- oblystyq ókildi jáne atqarýshy organdarǵa QR Úkimetine oblystyq jáne aýdandyq mańyzy bar qalalardy ózge eldi mekender etip qaita qurý týraly usynys engizý boiynsha jańa ókilettik berý;
- aýdandyq mańyzy bar qala ákimine aýdandyq ókildi jáne atqarýshy organdarǵa aýdandyq mańyzy bar qalany kent, aýyl sanatyna jatqyzý týraly usynys engizý boiynsha ókilettik berý.
«Atalǵan zań jobasy Qazaqstan Respýblikasynyń ákimshilik-aýmaqtyq qurylymy salasyndaǵy zańnamany jetildirýdi kózdeidi jáne elimizdiń ákimshilik-aýmaqtyq birlikteriniń, onyń ishinde aýdandyq mańyzy bar qalalardyń aǵymdaǵy mártebesin tolyq kólemde qamtýǵa baǵyttalǵan. Qoldanystaǵy «Qazaqstan Respýblikasynyń ákimshilik-aýmaqtyq qurylysy týraly» Zańyna sáikes aýdandyq mańyzy bar qalalarǵa halyq sany 10 myń adamnan kem emes eldi mekender jatady. Qazirgi ýaqytta 48 aýdandyq mańyzy bar qalanyń 13-i halyqtyń sany boiynsha qala mártebesine sáikes kelmeidi, iaǵni osy aýdandyq mańyzy bar qalalarda turǵyndar sanynyń azdyǵyna bailanysty olardyń mártebesin ózgertý qajettigi týyndady. Alaida qoldanystaǵy zańnamada aýdandyq mańyzy bar qalanyń mártebesin aýyl sanatyna ózgertý jóninde norma qarastyrylmaǵan», - dedi senator Nurlan Beknazarov.
