Qazaqstan Respýblikasynyń Prezidenti Qasym-Jomart Toqaevtyń halyqqa arnalǵan biylǵy joldaýy - elimizdi damytýdyń demokratiialyq negizderin ashyq aiqyndap bergen tarihi oqiǵa. Qazirgi geosaiasi jaǵynan kúrdeli zamanda memleketimizdiń búgini men bolashaǵy jolynda óte jaýapty jáne batyl bastamalar jasaldy. Búgingi joldaý elimizdiń tarihi qundylyqtary men qazirgi zamannyń kúrdeli dástúrlerin úndestire otyryp qabyldanǵan sheshimderge toly boldy.
Joldaýda Parlamenttiń ókilettigin arttyrýǵa, majoritarlyq sailaý júiesin birtindep endirýge, Prezidentten bastap, oblys ákimderin, saiasi qyzmetkerlerdi qosymsha saiasi-qoǵamdyq, partiialyq basqarý mindetterinen bosatýǵa, el ekonomikasyn damytýǵa qatysty mindetterdi sapaly atqarýǵa qatysty naqty tapsyrmalar berildi.
Eń úlken máselelerdiń biri – jergilikti máslihattar men ózin-ózi basqarý organdarynyń ókilettigin keńeitý, aýmaqtyq máselelerdi sheshýge turǵyndardy belsendi jumyldyrý ekeni anyq. Sailaý júiesin túbegeili ózgertý baǵytyndaǵy sharalar da aýqymdy bolmaq.
Bútkil qazaqstandyqtar úshin Abai, Ulytaý, Jetisý oblystarynyń jańadan ashylýy, Qapshaǵai qalasyna bolashaqta D.A. Qonaev esiminiń berilýi - óte qýanyshty, halyqtyń kópten kútken, eldiń eńsesin kóteretin, jańa belesterge bastaityn bastamalar ekeni shyndyq.
Joǵaryda aitylǵan jańalyqtar biylǵy Joldaýdaǵy qadaý-qadaý bastamalardyń bir bóligi ǵana. Alda atqarylatyn sharýalardyń odan da kóp ekendigin Prezident ashyq aitty.
Kóptegen memleketterde jalpy ahýaldyń qiyndap jatqan kezeńinde bizdiń elde osyndai naqty sheshimderdiń qabyldanýy el ekonomikasy men áleýetiniń turaqtylyǵyn jáne áleýmettik turǵydan óte mańyzdy qadamdarǵa bara alatyndyǵymyzdy kórsetedi. Memleket basshysynyń óte batyl da saliqaly, barlyq jaǵynan oilastyrylǵan sheshimderi úshin óz rizashylyǵymyzdy bildiremiz.
Prezidentimizdiń barlyq bastamalary halyqtyń bolashaǵy úshin. Olai bolsa, bárimiz de sol týdyń ainalasyna toptasyp, qańqý sózden aýlaq bolyp, birigip, birlesip, yntymaqtasyp qyzmet etýimiz kerek ekendigi anyq. Bul bárimiz úshin – úlken syn. Syn saǵattarda syndarly is-áreketter jasaý halqymyzǵa tán qasiet.
Qazaqstan Parlamentiniń Senaty Memleket basshysynyń tyń bastamalaryn iske asyrýdy zańnamalyq turǵydan qamtamasyz etý úshin tiisti jumystar atqaratyn bolady.
Áli BEKTAEV,
Parlament Senatanyń depýtaty
