Ulttyq qoǵamdyq senim keńesiniń besinshi otyrysynda QR Prezidenti Qasym-Jomart Toqaev áielderge qatysty zorlyq-zombylyq máselesin kóterdi, dep habarlaidy "Ult aqparat".
Prezidenttiń aitýynsha, ózekti áleýmettik másele retinde áielderge qatysty turmystyq zorlyq-zombylyq bolyp tur. Jyl saiyn elimizde áielderge qatysty jasalǵan 2,5 myńnan astam qylmys tirkeledi, osynyń saldarynan qaiǵyly oqiǵalar oryn alyp jatady. Áielderge qarsy zorlyq-zombylyq olardyń qoǵam ómirine tolyqqandy qatysýyna tosqaýyl bolyp, otbasy institýtyna keri áserin tigizedi.
«Bul máseleni tek memlekettik organdar men úkimettik emes uiymdardyń birlesken kúsh-jigerimen ǵana sheshý múmkin bolyp tur. Bul rette, Ishki ister ministrligine qarasty 1999 jyly qurylǵan Áielder men balalardy zorlyq-zombylyqtan qorǵaý jónindegi arnaiy bólimsheler mańyzdy ról atqarady», - dedi Memleket basshysy.
Osy oraida Q. Toqaev bul bólimsheler politsiianyń azamattyq qoǵammen ózara is-qimylynyń tiimdi býyny bolýy kerektigin atap ótti.
«Alaida, kezinde olardyń shtattyq sanynyń jartysyna jýyǵy qysqaryp qalǵan, ásirese, bul qyzmetkerler turmystyq zorlyq-zombylyq faktileri jii tirkeletin óńirlerde qysqarǵan. Bul problemany keńestiń alańynda áleýmettanýshy Gúlmira Ileýova kótergen edi. Ishki ister ministrligine múmkindiginshe Áielder men balalardy zorlyq-zombylyqtan qorǵaý jónindegi arnaiy bólimshelerdiń shtat sanyn qalpyna keltirýdi tapsyramyn», - dedi Prezident.
