Foto: Aqordanyń baspasóz qyzmeti
Prezident júz jasaǵan soǵys ardageri Ivan Gapichpen jáne 96 jastaǵy ólketanýshy Jaisań Aqbaimen kezdesip, áńgimelesti, - dep habarlaidy "Ult aqparat" Aqordanyń resmi saityna silteme jasap.
Memleket basshysy Qasym-Jomart Toqaev soǵys ardageri Ivan Gapichtiń úiine baryp, 100 jasqa tolǵan mereitoiymen quttyqtady. Prezident onyń ómir joly halyqqa qyzmet etýdiń, eren eńbektiń, otansúigishtiktiń jarqyn úlgisi sanalatynyn atap ótti.
"Bul jasqa jetý ekiniń biriniń mańdaiyna jazylmaidy. Onyń ústine, siz Uly Otan soǵysyna qatystyńyz. Biz maidan dalasynda bolǵan soǵys ardagerlerine zor qurmetpen qaraimyz. Soǵystan keiingi jyldary elge oralyp, prokýratýra organdarynda eńbek etip, elimizdiń damýyna súbeli úles qostyńyz. Sizge alǵys aitamyn", - dedi Memleket basshysy.
Ivan Gapich 1923 jyly Aqmola oblysynda dúniege kelip, Almatyda bilim alǵan. Ol maidan dalasynda Polshany, Chehoslovakiiany, Ýkrainany azat etýge qatysty. Soǵystan keiingi jyldary prokýratýra organdarynda qyzmet atqaryp, Qaraǵandy, Ońtústik Qazaqstan, Aqmola jáne Batys Qazaqstan oblystarynda uzaq jyl eńbek etti.
Sonymen qatar Prezident 96 jastaǵy jergilikti ólketanýshy, mádeniet qairatkeri Jaisań Aqbaimen de áńgimelesti.
"Sizdiń eńbek jolyńyz – kópshilikke úlgi-ónege. Partiiada, memlekettik qyzmette eńbek ettińiz. Otandyq mádeniet salasyn damytýǵa eleýli úles qostyńyz. Sizge myqty densaýlyq, otbasyńyzǵa baq-bereke tileimin", - dedi Qasym-Jomart Toqaev.
Jaisań Aqbai Batys Qazaqstan oblysynyń bilim jáne mádeniet salalarynda uzaq jyl eńbek etken. Sondai-aq ol óńirde ólketanýshylyq qyzmetimen tanymal.
Soǵys ardageri Ivan Gapich pen eńbek ardageri Jaisań Aqbai Prezidentke alǵys aityp, rizashylyǵyn bildirdi.
