Foto: Akorda.kz
Prezident Jetisý oblysynyń týristik áleýetimen tanysty, dep habarlaidy "Ult aqparat" Aqordanyń baspasóz qyzmetine silteme jasap.
Memleket basshysyna Shoqan Ýálihanov atyndaǵy «Altynemel» memorialdyq mýzeiinde Jetisý oblysynyń týrizm salasyn damytý úshin atqarylyp jatqan jumystar jóninde qysqasha málimet berildi.
Oblys ákiminiń orynbasary Rýstam Álidiń aitýynsha, týrizm salasynyń damýyna qatysty negizgi kórsetkishterde ósim baiqalady. Sońǵy úsh jylda óńirge kelgen týrister sany eki ese artqan. Al osy saladaǵy kórsetiletin qyzmetter kólemi 16 milliard teńgege deiin ósti.
Atalǵan baǵyttyń damýyna tyń serpin berý úshin birqatar infraqurylymdyq joba júzege asyrylyp jatyr.
Atap aitqanda, qazir Alakólge kóliktiń birneshe túrimen jetýge bolady. Byltyr Úsharal áýejaiynyń ushý-qoný jolaǵyna rekonstrýktsiia jasalyp, turaqty áýe qatynasy jolǵa qoiyldy. Biyl «Astana – Dostyq» baǵyty boiynsha «Talgo» poiyzy iske qosyldy jáne «Úsharal – Dostyq» avtojolynyń rekonstrýktsiiasy aiaqtaldy. Qazirgi kezde «Taldyqorǵan – Qalbataý – Óskemen» avtojolyn qaita jóndeý, Alakól kýrorttyq aimaǵynda joǵary voltty elektr jelilerin tartý jumystary júrgizilip jatyr.
Buǵan qosa «Balqash» týristik-rekreatsiialyq aimaǵynyń bas jospary» ázirlendi. Onyń aiasynda uzyndyǵy 16 shaqyrym bolatyn jaǵalaýǵa biýdjet esebinen injenerlik-kommýnikatsiialyq jeli tartylyp, jalpy aýmaǵy 860 gektar jerge 7 baǵyttaǵy demalys aimaqtary ornalastyrylady. Jospar sheńberinde 30 milliard teńgege deiin jeke investitsiia tartý kózdelgen. Sonymen qatar kelesi jyly kólge aparatyn «Almaty – Óskemen – Lepsi – Aqtoǵai» jolynyń rekonstrýktsiiasyn aiaqtaý josparlanyp otyr.
«Altyn-Emel», «Jońǵar Alataýy» ulttyq tabiǵi parkterinde ekologiialyq týrizmge basymdyq beriledi. Biyl «Altynemel» vizit-ortalyǵy ashyldy. Al «Jońǵar Alataýy» ulttyq parkiniń aýmaǵynda jalpy quny 1,7 milliard teńge bolatyn 8 investitsiialyq joba júzege asyrylmaq.
Sonymen qatar Tekeli mańaiynda shańǵy-biatlon keshenin salý jáne Burqanbulaq sarqyramasyna deiingi joldy jóndeý jumystary josparlanǵan.
Memleket basshysy týristik-demalys aimaqtaryna injenerlik-kommýnikatsiialyq jeli júrgizýmen jáne abattandyrýmen belsendi túrde ainalysyp, oblystyń týristik áleýetin arttyrý qajet ekenin aitty.
– Jalpy, oblysta týristik nysandar jetkilikti. Sondyqtan onyń bárine tiisti deńgeide mán berip, damytý kerek. Týrizm Jetisý oblysy ekonomikasynyń basym baǵyty bolýǵa tiis. Týrister neǵurlym kóbirek kelse, oblysqa da oń septigin tigizedi. Oblystyń týrizm salasyndaǵy áleýeti óte zor, – dedi Prezident.
