Foto: Akorda.kz
Prezident Qasym-Jomart Toqaevtyń Jambyl oblysyna jumys sapary jazýshy Sherhan Murtaza eskertkishine gúl shoǵyn qoiýdan bastaldy, dep habarlaidy "Ult aqparat" Aqordaǵa silteme jasap.
Memleket basshysy eskertkishtiń janynda jergilikti ziialy qaýym ókilderimen júzdesip, belgili qalamgerdiń ult rýhaniiatyn damytýǵa zor úles qosqanyn aitty.
– Sheraǵań – halqymyzdyń birtýar azamaty, zańǵar jazýshy desek artyq aitqandyq emes. Jas kezimizden bastap biz bárimiz onyń «Qyzyl jebe» romanyn, basqa da shyǵarmalaryn oqydyq. Ásirese, «Bir kem dúnie» týyndysy áli kúnge deiin ózekti. Halqymyzǵa, ásirese, jastarǵa rýhani azyq bolǵan dúnie dep aitýǵa bolady. Sondyqtan jazýshynyń eskertkishine arnaiy kelip, taǵzym etip otyrmyz,– dedi Qasym-Jomart Toqaev.
Kezdesý barysynda jergilikti ziialy qaýym ókilderi eldi tolǵandyratyn máselelerdi aityp, óz oilaryn ortaǵa saldy. Olar Memleket basshysynyń bastamasymen júrgizilip jatqan qoǵamdyq-saiasi reformalardy qoldaitynyn jetkizip, shyǵarmashylyq adamdaryna memlekettiń kórsetip jatqan qamqorlyǵy úshin alǵys aitty.
Prezident jazýshynyń balasy retinde shyǵarmashylyq adamdaryn árqashan qoldaitynyn atap ótti. Sondai-aq elimiz damyp, órkendeýi úshin aldaǵy saiasi naýqandar kezinde de, eń aldymen, aýyzbirshilik qajet ekenine nazar aýdardy.
– Eń basty másele – ádil, ashyq bolý kerek. Osyndai laiyqty adamdar bizdiń Parlamentke kelse, elimizdiń damýyna úles qosady dep úmittenemin. Dúniejúzinde bolyp jatqan jaǵdaidy ózderińiz jaqsy bilesizder. Ishki saiasat ta, syrtqy saiasat ta syndarly, salmaqty bolýy kerek. Eń basty mindetimiz – memlekettiligimizdi saqtap qalý. Syn-qaterler az emes. Sondyqtan bárimiz bir el, bir halyq, bir ult bolyp uiysyp, el úshin qyzmet eteiik, – dedi Memleket basshysy.
