Memleket basshysy Batys Qazaqstan oblysynyń ákimi Ǵali Esqalievti qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Qazaqstan Prezidentine óńirdiń áleýmettik-ekonomikalyq damýynyń negizgi kórsetkishteri, sondai-aq, buǵan deiin berilgen tapsyrmalardyń oryndalýy jóninde baiandaldy.
Qasym-Jomart Toqaevqa Jaiyq ózenindegi sý deńgeiiniń tómendeýi, óńirdiń energiiaǵa táýeldiligi jáne jergilikti joldardyń jaǵdaiy siiaqty oblystaǵy negizgi máseleler týraly málimet berildi. Memleket basshysy Batys Qazaqstan oblysynyń ákimine Úkimetpen birlese otyryp, atalǵan problemalardy sheshýdi tapsyrdy.
Qasym-Jomart Toqaev etti mal sharýashylyǵyn damytý jáne osy baǵytqa ǵylymi turǵydan basa mán berý, munai men gaz óndirýge qatysy joq salaǵa tartylatyn investitsiiany ulǵaitý, ónerkásipti ártaraptandyrý, sondai-aq, óńdeý sektorynyń óndirisin arttyrý jóninde Ǵali Esqalievtiń aldyna birqatar mindet qoidy.
Memleket basshysy jumyssyz jáne ózin-ózi jumyspen qamtyǵan azamattardy ekonomikalyq qyzmetke tartýdy jalǵastyrýǵa, sonymen qatar aimaqtaǵy úsh aýysymdy jáne apatty jaǵdaidaǵy mektepterge qatysty máselelerdi túbegeili sheshýge tapsyrma berdi.
