QR Prezidentiniń keńesshisi Erlan Qarin eldegi sońǵy kadrlyq aýys-túiiske qatysty pikir bildirdi, dep habarlaidy "Ult aqparat".
«Prezident Qasym-Jomart Toqaev kadrlardy aralastyryp, tyń amaldardy paidalaný jolymen memlekettik qyzmet júiesine jańa basqarýshylardy tartý isin belsendi túrde qoldap keledi. Atap aitqanda Memleket basshysy Prezidenttik kadrlyq rezervin quryp, onyń aiasynda 300 rezervshi irikteldi. Olardyń 150-i memlekettik jáne kvazimemlekettik sektorda jumysqa ornalasty. Búgin ǵana Prezidenttiń kadrlyq rezerviniń ókili Aibek Sattybaev Shymkent qalasy ákiminiń orynbasary bolyp taǵaiyndaldy. Sonymen qatar, keshe Ulttyq senim qoǵamdyq keńesiniń múshesi Shyńǵys Muqan Shymkent qalasy ákiminiń birinshi orynbasary boldy», - dep jazdy Erlan Qarin telegram kanalynda.
Prezidenttiń keńesshisi Shyńǵys Muqan Ulttyq keńestiń memlekettik qyzmetke qabyldanǵan alǵashqy múshesi emes ekenin de eske saldy. Buǵan deiin Ulttyq keńes qatarynan «jumyldyrylǵan» Baǵdat Mýsin aldymen Prezidenttiń keńesshisi bolsa, qazirgi ýaqytta Tsifrlyq damý, innovatsiia jáne aeroǵarysh ónerkásibi ministrliginiń ýaqytsha ministri bolǵan. Al Berik Ábdiǵaliuly 2019 jyldyń qazan aiynda Qaraǵandy oblysy Ulytaý aýdanynyń ákimi bolyp taǵaiyndalsa, Maksim Spotkai jaqynda Parlament Senaty apparaty basshysynyń orynbasary bolyp barǵan.
«Osylaisha keiingi ýaqytta jastar men qoǵam ókilderi arasynan Prezident jańa kadrlardy belsendi túrde tartyp jatyr. Osynyń arqasynda basqarýshy býyn josparly túrde jańartylýda», - dedi ol.
