Qazaqstan Respýblikasy Prezidentiniń adam quqyqtary salasyndaǵy odan ári sharalary týraly Jarlyǵy múmkindigi shekteýli adamdardyń quqyǵyn qamtamasyz etýge baǵyttalǵan qazirgi protsesterdiń katalizatory bolady. Bul týraly Q.Imanaliev atyndaǵy Múgedekterdiń quqyqtary jónindegi komissiia jetekshisi Veniamin Alaev málim etti, dep habarlaidy QazAqparat.
«Jalpy, atalǵan Jarlyqqa qol qoiýdy ońtaily baǵalap otyrmyn. Qujatqa múgedektigi bar azamattarǵa qatysty adam quqyqtary engizilgenine qýanyshtymyn. Muny múmkindigi shekteýli jandardyń quqyqtaryn qamtamasyz etýge baǵyttalǵan qazirgi portsesterdiń katalizatory bolady dep úmittenemin. Múgedektigi bar adamdardyń quqyqtary áli de buzylyp keledi, sondyqtan bizdiń quqyqtarymyz jaiynda belsendi túrde jariialanyp otyr. Múmkindigi shekteýli belsendiler men sarapshylar Májilis, Senat, Eńbek ministrligi janyndaǵy jumys toptaryna shaqyrtylyp keledi. Onda bizdiń ókilder kóptegen salmaqty usynystar engizip jatqanyn kórip otyrmyz», - dedi Veniamin Alaev.
Onyń aitýynsha, qazirgi kezde BUU-nyń Múgedektigi bar adamdardyń quqyqtary týraly konventsiiasynyń normalaryna sáikes bolýy úshin elimizdiń zańdaryna tiisti túzetýler engizý jalǵasyp jatyr. Onda múmkindigi shekteýli jandardyń quqyqtaryn jaqsartatyn túzetýler eskerilgen.
«Bul protsestiń ilgerilip, alǵa jyljyǵany mańyzdy. Eń bastysy, osy zańdar oryndalýy tiis. BUU-nyń Múgedektigi bar adamdardyń quqyqtary týraly konventsiiasy 2015 jyly ratifikatsiialandy. Kóbisi múmkindigi shekteýli adamdardyń ómiri birden jaqsaryp ketedi dep oilady, alaida bul ýaqytty qajet etetin protsess ekenin kórip otyrmyz», - dedi sarapshy.
«Atap aitqanda, Jarlyq bul baǵyttaǵy protsesterdi aiaqtaýǵa qosymsha senimdilik beredi dep sanaimyn», - dedi Q.Imanaliev atyndaǵy Múgedekterdiń quqyqtary jónindegi komissiia jetekshisi Veniamin Alaev.
Aita keteiik, osyǵan deiin Qazaqstan Prezidenti Qasym-Jomart Toqaevtyń QR adam quqyqtary salasyndaǵy odan ári sharalary týraly Jarlyqqa qol qoiǵany habarlandy.
