Foto: Akorda.kz
Memleket basshysy Kókshetaý qalasynda byltyr mamyr aiynda ashylǵan «Viamedis Kokshetau» klinikalyq ońaltý ortalyǵyna bardy, dep habarlaidy "Ult aqparat" Aqordanyń resmi saityna silteme jasap.
Bul – insýlttan keiin ońaltý sharalary júrgiziletin elimizdegi alǵashqy ortalyq. Onyń janynan memleket pen jekemenshik seriktestigi aiasynda 250 patsientke arnalǵan emhana salynǵan. Statsionarlyq ońaltý bóliminde 100-den astam, kúndizgi statsionarda 46 tósek-oryn qarastyrylǵan. Emhanada 20 myń adam tirkelgen. Densaýlyq saqtaý mekemesinde 235 meditsina qyzmetkeri jumys isteidi.
Prezidentke emhana basshylyǵy ortalyqtyń naýqastarǵa sapaly ári jedel diagnoz qoiýǵa múmkindik beretin zamanaýi meditsinalyq apparattarmen jáne quraldarmen jabdyqtalǵany jóninde málimet berdi.
Budan keiin Qasym-Jomart Toqaevqa Aqmola oblysyndaǵy densaýlyq saqtaý salasynyń qazirgi ahýaly týraly baiandaldy. Óńirde 560 meditsinalyq nysan jumys istep tur. Onda jalpy 7800-ge jýyq meditsina qyzmetkeri eńbek etedi. Dárigerlerdiń tapshylyǵy sońǵy úsh jylda eki ese azaiǵan. Oblys 1,4 milliard teńgege 80-ge jýyq meditsinalyq tehnika satyp aldy.
«Aýyldyq densaýlyq saqtaýdy jańǵyrtý» ulttyq jobasy aiasynda oblystaǵy 38 eldi mekende ambýlatorlyq-emhana nysandaryn salý josparlanyp otyr.
Memleket basshysyna Densaýlyq saqtaý ministrliginiń sheteldik investormen birlesip, Kókshetaýda 630 oryndyq kópsalaly zamanaýi aýrýhana salý jobasyn júzege asyryp jatqany týraly aityldy.
Prezidentke osy meditsinalyq ortalyq ornalasqan Kókshetaý qalasynyń Saryarqa shaǵynaýdanynyń qurylysy tanystyryldy. Alǵashqy irgetasy 2012 jyly qalanǵan shaǵynaýdannyń aýmaǵy – 1120 gektar. Bul jerde 56 kópqabatty turǵyn úi salynǵan. Ál-Farabi atyndaǵy IT-mektep pen órt sóndirý beketi, birqatar sport nysany paidalanýǵa berilgen. Aldaǵy ýaqytta 256 kópqabatty turǵyn úi, 21 bilim berý nysany, 2 saýda ortalyǵy jáne saiabaq alańdaryn salý josparlanyp otyr.
