QR Prezidenti Nursultan Nazarbaev Túrkistan qalasyn damytý boiynsha keńes ótkizdi. Oǵan otandyq kásipkerler shaqyryldy. Sol jerde QR Premer-Ministriniń birinshi orynbasary Asqar Mamin Memleket basshysyna qalany damytý josparyn tanystyrdy, dep xabarlaidy "Ult aqparat".
«Túrkistan qalasynyń bas josparyn ázirleýge qatysty xalyqaralyq konkýrs uiymdastyryldy. 22 usynystyń ishinen úzdik joba tańdaldy. Qurmetti Nursultan Ábishuly, atalǵan joba sizdiń tapsyrmańyzda qoiylǵan talaptarǵa tolyǵymen sáikes keledi. Sonyń ishinde Túrkistannyń tarixi qundylyqtaryn saqtaý, odan ary kórkeitý, Qoja Axmet Iassaýi kesenesi negizinde mádeni-rýxani ortalyqty saqtaý jáne ákimshilik-iskerlik ortalyqty qurýǵa erekshe kóńil bólindi», - dedi A.Mamin.
Vitse-premerdiń aitýynsha, qazirgi kezde qalanyń aýmaǵy - 9 700 gektar, xalyqtyń sany - 162 000 adam. Bas josparǵa sáikes, qala aýmaǵy 22 000 gektarǵa deiin keńeiedi. Halyqtyń sany 2035 jyly 350 000, al 2050 jyly 500 000 adamǵa deiin ósedi degen boljam bar.
«Aldymen 25 gektarǵa injenerlik kommýnikatsiialar tartylady. Ol jerde oblys ákimdigi men onyń mekemeleri, memlekettik organdardyń aýmaqtyq bólimsheleri, kongress ortalyǵy jáne «Túrkistan bas jospary» mekemesi ornalasady. Al Túrki áleminiń mádeni jáne rýxani ortalyǵynyń jalpy aýdany 2 211 gektardy quraidy. Birinshisi - Qoja Axmet Iassaýi kesenesi ainalasyndaǵy 89 gektar, ekinshisi - qurylys salýdy retteý aimaǵynyń 98 gektary, sonyń ishinde Qoja Axmet Iassaýi kesenesi kireberis aimaǵyn qalpyna keltirý, úshinshi jáne tórtinshi - tarixi kósheler men tarixi oramdardy qalpyna keltirý aimaǵy, besinshi - 1 400 gektardy quraityn saiabaq aimaǵy, ol jerde demalys jáne túrki mádenietimen tanysý aimaǵy bolady», - dep atap kórsetti A.Mamin.
2019-2021 jyldar aralyǵynda 10 000 páterdi paidalanýǵa berý josparlanyp otyr. Al qala xalqynyń ósýine bailanysty «Kentaý-Túrkistan» sý magistraliniń ekinshi jelisi salynady. Budan bólek, xalyqaralyq áýejai men avtovokzal turǵyzylady. Aldaǵy ýaqytta jańa temirjol vokzalynyń qurylysy da qaralady.
«Túrkistan qalasyna investitsiia tartý jáne qolaily investitsiialyq klimat jasaý maqsatynda arnaiy ekonomikalyq aimaqty qurýdy usynamyz. Al aimaqaralyq saýdany damytý maqsatynda Úkimet Qazaqstan men Ózbekstannyń shekarasynda xalyqaralyq saýda ortalyǵyn ashýdy usynyp otyr», - dedi A.Mamin.
Baiandamalardy tyńdaǵan soń Qazaqstan Prezidenti qabyldanǵan jol kartasyn sapaly ári ýaqtyly júzege asyrý, sondai-aq oblystyq basqarý organdary tarapynan barlyq memlekettik qyzmetterdiń úzdiksiz kórsetilýin qamtamasyz etý qajettigin atap ótti.
Nursultan Nazarbaev óńir basshylyǵy nazar aýdarýǵa tiis jekelegen máselelerge toqtaldy.
– Oblystyń qarjylyq turaqtylyǵyn nyǵaitý qajet. Shymkenttiń oblys quramynan shyǵýyna bailanysty aimaqtyń ekonomikalyq bazasy tómendedi. Búgingi tańda oblys biýdjet qajettilikteriniń 20 protsentin ǵana óz kúshimen qamtamasyz etedi. Negizgi mindet – ósimniń jańa rezervterin jáne óńir biýdjetiniń kiris bóligin tolyqtyrý kózin tabý, – dedi Memleket basshysy.
Qazaqstan Prezidenti halyqty jumyspen qamtýdyń, sondai-aq kásipkerlikti órkendetý, aýyl sharýashylyǵyn damytý jáne kólik-logistika qyzmetteriniń sapasyn arttyrý úshin jaǵdai jasaýdyń mańyzdylyǵyn atap ótti.
– «Ortalyq Aziia» halyqaralyq saýda aimaǵyn qurý múmkindigin qarastyrǵan jón. Bul Túrkistan oblysymen qatar jalpy respýblika ekonomikasynyń da órkendeýine tyń serpin beredi. 2020 jylǵa qarai Ózbekstanmen aradaǵy taýar ainalymyn 5 milliard AQSh dollaryna deiin arttyrýǵa áleýetimiz jetedi. Osyǵan bailanysty Úkimetke Túrkistan oblysynyń ákimdigimen birlesip, Ózbekstan tarapymen Halyqaralyq saýda aimaǵyn jáne jańa «Túrkistan» halyqaralyq ótkizý beketin qurý máselesin pysyqtaýdy tapsyramyn, – dedi Nursultan Nazarbaev.
Memleket basshysy ishki týrizmdi órkendetý jáne tiisti týristik infraqurylym daiyndaý máselelerine toqtaldy.
Qazaqstan Prezidenti oblysty damytý jáne qurylys júrgizý isine jergilikti biznes ókilderin, sondai-aq ulttyq kompaniialar men kvazimemlekettik sektor kásiporyndarynyń basshylaryn belsendi atsalysýǵa shaqyrdy.
Jiynda Qazaqstan Prezidenti Úkimet pen aimaq basshylyǵyna oblys ortalyǵyn odan ári damytý jóninde birqatar naqty tapsyrma berdi.
Nursultan Nazarbaev investitsiia tartý arqyly qala ishindegi joldardy jóndeý, sondai-aq Shymkent jáne Qyzylorda baǵyttaryna arnalǵan avtovokzal salý jumystaryn qamtamasyz etýdi tapsyrdy.
– Shahar turǵyndary sanynyń ósýine jáne týristerdiń kóptep kelýine bailanysty, ákimdikke «Samuryq-Qazyna» ulttyq ál-aýqat qorymen, Investitsiialar jáne damý ministrligimen birlesip, Túrkistan qalasynyń temirjol vokzalyn rekonstrýktsiialaý, onyń ótkizý múmkindigin ulǵaitý, sondai-aq aeroport salý jáne áýe qatynastaryn qamtamasyz etý máselelerin qarastyrýdy tapsyramyn, – dedi Qazaqstan Prezidenti.
Sonymen qatar, Memleket basshysy áleýmettik nysandardy damytý, turǵyn úi, bilim berý jáne densaýlyq saqtaý mekemelerin salý, injenerlik infraqurylymdy, sonyń ishinde gazben jáne jylýmen qamtamasyz etý salalaryn ilgeriletý máselelerine toqtaldy. Osyǵan orai Nursultan Nazarbaev balamaly energiia kózderin paidalaný múmkindigin qarastyrýdy tapsyrdy.
– Kásipkerlikti damytý jáne investitsiia tartý úshin jaǵdai jasaý kerek. Jańa qonaq úilerdiń, meiramhanalar men dámhanalardyń, saýda oiyn-saýyq ortalyqtarynyń jáne basqa da nysandardyń qurylysyn bastaý qajet, – dedi Qazaqstan Prezidenti.
Nursultan Nazarbaev Túrkistanda týrizm, qurylys jáne óndiris salalaryndaǵy biznesti órkendetý úshin qolaily jaǵdai qalyptastyratyn arnaiy ekonomikalyq aimaq qurýdyń ózektiligin atap ótti.
– Túrkistandy zamanaýi tehnologiialardy qoldana otyryp, óz mádenietimizge sai qaita jańǵyrtý kerek. Bul oraida onyń ejelgi sáýlet ónerin saqtap qalý qajet. Úkimetke, oblys ákimdigine halyq sanynyń ósý qarqynyn esepke ala otyryp, qalanyń bas josparyn daiyndaýdy tapsyramyn, – dedi Memleket basshysy.
Sońynda Qazaqstan Prezidenti Túrkistandy damytýdyń bas josparynyń tujyrymdamasyn bekitý, sondai-aq «TURKISTAN» arnaiy ekonomikalyq aimaǵyn qurý týraly jarlyqtarǵa jariia túrde qol qoidy.
.jpeg)