Búgin QR Prezidenti Qasym-Jomart Toqaev alǵash ret is-saparmen Túrkistan qalasyna keldi. Memleket basshysy áýeli Qoja Ahmet Iasaýi kesenesine at basyn buryp, «Áziret Sultan» qoryq-mýzeiin jańǵyrtý josparymen tanysty, dep habarlaidy "Ult aqparat".
Memleket basshysyna mádeni nysandardyń qaita jóndeý jumystary jáne qoryq-mýzeidiń aýmaǵyn abattandyrý barysy jóninde baiandaldy.
Jumys sapary barysynda Qasym-Jomart Toqaev «Uly Dala eli» ortalyǵy men ákimshilik-iskerlik ortalyqtaǵy oblystyq ákimdiktiń, basqarmalar ǵimarattarynyń qurylysyn aralap kórdi. Sondai-aq, jańadan salynyp jatqan Kongress holl men Media ortalyqtyń qurylys barysymen de tanysty.
Aita keteiik, «Uly Dala eli» ortalyǵynyń jalpy aýmaǵy - 1,32 gektar. Atyraý oblysy tartý etetin ǵimarat 2020 jyly salynyp bolmaq. Al oblystyq ákimdik pen basqarmalar, departamentter ǵimarattarynyń qurylysyna jaýapty ári oryndaýshy - «BI group» kompaniiasy. Bul ǵimarattardyń qurylysy aǵymdaǵy jyly aiaqtalady dep kútilýde. Kongress-holldyń aýmaǵy 3,1 gektar jerge salynýda. Onyń qurylysyn júrgizip jatqan «BI group» JShS nysandy 2020 jyly paidalanýǵa beremiz dep otyr.
Sondai-aq Almaty qalasy salýǵa tiisti Media ortalyq biyl jeltoqsan aiynda paidalanýǵa berilmek. Onyń jalpy aýmaǵy - 1,56 gektar jerdi alyp jatyr.
Memleket basshysy jýyrda ǵana tusaýy kesilgen oblystyq «Jastar resýrstyq ortalyǵyna» da aialdady. Qasym-Jomart Kemeluly ortalyqta «Jastarǵa qyzmet kórsetý», «Eriktiler klýby», «Jas sarbaz», «Tilder mektebi» jáne «Stem» jobalarymen tanysty. Sondai-aq, «TURKISTAN HUB» kovorking ortalyǵynyń rezidentterimen kezdesti. Búgingi tańda ortalyq bir ýaqytta 400-ge jýyq jasqa qyzmet kórsete alady.
Prezident sapary Túrkistanda «Nurly jer» baǵdarlamasy boiynsha salynyp jatqan turǵyn úilerdiń qurylysymen tanysýymen jalǵasty. Jalpy aýmaǵy 96 200 sharshy metrdi quraityn 1560 páterlik 26 kópqabatty turǵyn úi aǵymdaǵy jyly el igiligine tapsyrylady dep josparlanǵan.
.jpeg)