QR Prezidentiniń baspasóz hatshysy Berik Ýáli Facebook paraqshasynda Memleket basshysynyń týǵan kúndi qalai atap ótetindigi týraly jazdy, dep habarlaidy "Ult aqparat".
«Sońǵy kúnderi birqatar aqparat quraldarynyń ókilderi «Memleket basshysy týǵan kúnin qalai atap ótedi?» degen saýal joldap jatyr. Biylǵy 17 mamyr jeksenbi kúnine sáikes kelip otyr. Sondyqtan Qasym-Jomart Kemeluly úiinde jumys isteidi. Atalǵan dataǵa orai eshqandai shara ótpeidi. Tipti, Prezident Ákimshiliginiń qyzmetkerlerine týǵan kúnimen quttyqtamaý, estelik syilyqtar tartý etpeý týraly eskertý jasaldy. Prezident bul kúndi toilaǵandy unatpaidy. Óitkeni ol kisiniń otbasynda balalardyń da, eresekterdiń de týǵan kúni toilanbaidy eken. Ondai dástúr qalyptaspaǵan», - dep jazdy paraqshasynda Berik Ýáli.
Degenmen erteń Qasym-Jomart Kemelulyn týǵan kúnimen kórshiles memleketterdiń basshylary telefon arqyly quttyqtaidy dep kútilýde. Qazirdiń ózinde kóptegen Memleket jáne Úkimet basshylarynyń, Parlament tóraǵalary men halyqaralyq uiym jetekshileriniń quttyqtaǵan jedel hattary kelip jatyr.
«Mundai quttyqtaýlar erteń keshke deiin áli de jalǵasa beredi dep oilaimyn»,-dep jazdy Prezidenttiń baspasóz hatshysy.
