Memleket basshysy Qasym-Jomart Toqaev «Tsifrlyq Qazaqstan» memlekettik baǵdarlamasyn júzege asyrý jóninde keńes ótkizdi, dep habarlaidy Aqordanyń baspasóz qyzmeti.
Qazaqstan Prezidenti keńeske deiin «Smart Data Ukimet» jobasy aiasynda Bilim jáne ǵylym, Densaýlyq saqtaý, Eńbek jáne halyqty áleýmettik qorǵaý, Qarjy ministrlikteri men «Ulttyq aqparattyq tehnologiia» aktsionerlik qoǵamy atqarǵan jumystarynyń nátijesimen tanysty. Sonymen qatar Memleket basshysyna «Smart Bridge» jáne Internet resýrstardyń biryńǵai platformasy jaiynda málimet berildi.
Qasym-Jomart Toqaev tsifrlandyrý degenimiz bir ǵana salany nemese bir baǵytty damytý emes ekenine toqtalyp, onyń eń aldymen, ekonomikanyń, ónerkásiptiń jáne qoǵamnyń damýyna túbegeili ózgerister ákelýi qajettigin basa aitty. Sondyqtan barlyq memlekettik organdar men vedomstvoǵa qarasty mekemelerge ortaq monitoring júiesin qurýdyń mańyzdylyǵyn eskertti.
Qazaqstan Prezidenti Tsifrlyq damý, innovatsiialar jáne aeroǵarysh ónerkásibi ministrligi ozyq, zamanaýi júielerdiń qozǵaýshy kúshi bolýy tiis ekenin, ázirge bul maqsatqa tolyq qol jetkizbegenimizdi atap ótti. Memleket basshysynyń pikirinshe, bul jumysta birtutas kózqaras, naqty júie joq. Sonyń saldarynan tsifrlandyrý túrli vedomstvolarǵa shashyrap, jaiylyp ketken.
– «Big Data» tehnologiiasyn, «jasandy intellekt» algoritmin qoldaný naqty ári dál derekter bazasyn qurýǵa, qate nemese eskirgen aqparattardy anyqtaýǵa, shashyrańqy málimetterdiń birtutas jáne obektivti kórinisin aiqyndaýǵa kómektesedi. Sondyqtan Úkimetke barlyq memlekettik organdardy jumyldyra otyryp, «Smart Data Ukimet» jobasyn qysqa merzimde iske qosýdy tapsyramyn, – dedi Qasym-Jomart Toqaev.
Prezident aqparattyq tehnologiia damyǵan zamanda memlekettik tsifrlyq qyzmetter kez-kelgen qarapaiym adamǵa túsinikti jáne qoljetimdi bolýy tiis ekenin jetkizdi. Sonymen qatar qandai da bir qyzmet túrlerin iske qosar aldynda ártúrli sanattaǵy azamattardan quralǵan toptar jasaqtalyp, oǵan halyqty belsendi qatystyryp, keńesý kerek ekenin aitty.
Qasym-Jomart Toqaev Úkimetke Indýstriia 4.0 aiasynda atalǵan jobany keńeitý úshin retteýdiń jáne yntalandyrýdyń keshendi sharalaryn ázirleýdi tapsyrdy.
– Memlekettik basqarý júiesinde tsifrlyq tehnologiiany qoldaný – búkil baǵdarlamanyń tabysty bolýynyń basty kilti. Bul iste túbegeili ózgerister qajet. Barlyq qujat ainalymyn tolyqtai elektrondy formatqa kóshirý kerek. Qazirgi kezde talap etetindei, qujattardy qaǵaz júzinde de, elektrondy túrde de daiyndap, tapsyrý durys emes. Qujattardyń qaǵaz nusqalaryna birtindep tyiym salynýy kerek, – dedi Memleket basshysy.
Prezident tiisti zańnamalyq aktilerge, memlekettik organdardyń jumys reglamentterine qajet bolǵan jaǵdaida ózgertýler engizý kerek ekenine nazar aýdaryp, Úkimetke, Parlament palatalarynyń Apparattaryna, basqa da organdarǵa osy baǵytta tolyqqandy sharalar qabyldaýdy tapsyrdy.
Memleket basshysy taǵy bir ózekti másele retinde óńirlerdi tsifrlandyrý jaǵdaiyn aitty. Bul jumysta alǵa jyljý bolǵanmen, ár aimaqta jáne barlyq salada birkelki iske aspai jatqanyn jetkizdi.
– Biznes pen azamattar tarapynan joǵary suranysqa ie, biraq sybailas jemqorlyq jii bolatyn salalarda tsifrlandyrý óte baiaý júrgizilýde. Bul jer telimderin berý, tabiǵi monopoliialardyń qyzmetterine qosylý, qoǵamdyq kólikte jolaqy tóleý júiesi jáne basqa da salalarda kóptep kezdesedi. Jergilikti atqarýshy organdar atalǵan máselege qatysty belsendi jumys isteidi dep senemin. Tsifrlyq damý ministrligi bul jumysty tiisti deńgeide jolǵa qoiýy tiis. Prezident Ákimshiligine baqylaýǵa alýdy tapsyramyn, – dedi Qasym-Jomart Toqaev.
Memleket basshysy internettiń joqtyǵyn nemese onyń baiaý jumys isteitinin aita kelip, qala men aýyl turǵyndary arasynda «tsifrlandyrý alshaqtyǵy» bar ekenin atap ótti.
– Bul jái ǵana alshaqtyq emes, áleýmettik teńsizdik. Sondyqtan Úkimet «tsifrlyq alshaqtyqty» retteý jumystaryn jandandyrýy qajet, – dedi Prezident.
Qasym-Jomart Toqaev Qazaqstandaǵy derekter bazasynyń eselep artýyna qarai tiisti infraqurylym men servis daiyndaý qajettigine nazar aýdardy.
Memleket basshysy elimizdiń sheteldik ázirlemeler men tehnologiialarǵa álde de táýeldi ekenin aitty. Sondyqtan qajetti IT jobalardy ázirlep, engizý úshin Úkimetke «Astana Hab», «Alataý» Innovatsiialyq-tehnologiialar parki, «Nazarbaev Ýniversiteti» kásiporyndarynyń áleýetin arttyrý jumystaryn jandandyrýdy tapsyrdy.
– Halyqaralyq jaǵdailardy eskere otyryp, zańnamalyq deńgeide básekege qabiletti otandyq ázirlemelerge basymdyq bere otyryp, satyp alý máselesin pysyqtaý qajet. Bul eń aldymen memlekettik sektorǵa qatysty. Sol sebepti Úkimetke tsifrlyq jobalardy kelisý rásimderin jeńildetý jóninde usynys berýdi tapsyramyn. Bizdiń zańnamalarda bazalyq ádister bekitilgen. Sonymen qatar venchýrlyq qyzmetti tolyqtai tártipke keltirý jáne yntalandyrý máselesin de oilastyrý qajet, – dedi Qasym-Jomart Toqaev.
Qazaqstan Prezidenti Úkimet pen UQK birlesip aqparattyq resýrstardy jáne jalpy «tsifrlyq derbestikti» tiimdi qorǵaýdy qamtamasyz etý jóninde tapsyrma berdi. Onyń aitýynsha, bul maqsatta aqparattyq qaýipsizdiktiń 10 jedel ortalyǵyn qurý jumysyn jalǵastyrý qajet. Sondai-aq «aqparattyq qaýipsizdik» mamandyǵy boiynsha bilim berý grantyn kemi eki myńǵa deiin arttyrý kerek.
Memleket basshysy tsifrlandyrý salasyna jaýapty vitse-ministrler memlekettik apparattyń jumysyna oń ózgerister ákelýi qajettigin, sonymen qatar, olar ekonomikada jáne basqa da salalarda tsifrlyq reformalardy qolǵa alýy tiis ekenin atap ótti.
– Olardyń mindeti – kúndelikti jumys emes, reformalar men ózgeristerdi iske asyrý. Osy rette, memlekettik organdarda tsifrlandyrý ofitseri laýazymyn engizý kerek. Jergilikti jerlerde ákimniń naqty bir orynbasaryn tsifrlandyrýǵa jaýapty etip bekitý qajet. Olar Tsifrlyq damý ministrligimen tyǵyz jumys isteýi tiis, – dedi Prezident.
Jiyn sońynda Qasym-Jomart Toqaev tsifrandyrý memlekettik mańyzdy is, el ekonomikasynyń damýy atalǵan salaǵa tikelei bailanysty ekenin basa aitty.
Keńeste Tsifrlyq damý, innovatsiialar jáne aeroǵarysh ónerkásibi ministri Asqar Jumaǵaliev, Premer-Ministrdiń birinshi orynbasary – Qarjy ministri Álihan Smaiylov, Eńbek jáne halyqty áleýmettik qorǵaý ministri Birjan Nurymbetov, Almaty qalasynyń ákimi Baqytjan Saǵyntaev baiandama jasady.
