Qasym-Jomart Toqaev transulttyq kompaniia basshylarymen kezdesti, - dep habarlaidy "Ult aqparat" Aqordaǵa silteme jasap.
Qazaqstan Prezidenti janyndaǵy sheteldik investorlar keńesiniń XXXIV otyrysynyń qarsańynda Memleket basshysy Chevron korporatsiiasynyń atqarýshy vitse-prezidenti Djeims Djonsonmen, Exxon Mobil korporatsiiasynyń aǵa vitse-prezidenti Nil Chapmanmen, sondai-aq, Qazaqstannyń Kanadadaǵy qurmetti konsýldary - kanadalyq Cameco ýran kompaniiasynyń prezidenti Timoti Gittselmen jáne Condor Petroleum kompaniiasynyń prezidenti Don Striýmen kezdesti.
Djeims Djonsonmen áńgimelesý barysynda Qasym-Jomart Toqaevqa korporatsiianyń elimizde atqaryp jatqan jumystarynyń qazirgi nátijeleri men aldaǵy kezeńge arnalǵan jospary týraly málimet berildi. Sonyń ishinde Teńiz ken ornyn bolashaqta keńeitý jobasy boiynsha qurylys-montaj jumystaryn tezirek aiaqtaý máselesi sóz boldy.
Sonymen qatar, Qarashyǵanaq ken ornynyń óndiris qýatyn arttyrý máselesi, Qazaqstanda otandyq ónimderdi qoldaýǵa jáne qorshaǵan ortany qorǵaýǵa baǵyttalǵan Chevron korporatsiiasynyń tikelei investitsiia salatyn qorynyń qyzmeti talqylandy.
Nil Chapman Memleket basshysyna Qarashyǵanaq ken ornyndaǵy gaz óńdeý zaýyty qurylysynyń barysy, Teńiz ken ornynan eksporttalatyn gaz kólemin ishki naryqqa qaita tasymaldaý jáne balama baǵyttar arqyly Qazaqstan munaiyn jetkizý múmkindikteri jóninde aitty.
Timoti Gittselmen jáne Don Striýmen áńgimelesý kezinde Qazaqstanda birlesken investitsiialyq jobalardyń júzege asyrylý barysy sóz boldy. Cameco kompaniiasynyń prezidenti Qasym-Jomart Toqaevqa elimizdegi ýran kompaniiasynyń jumysy men aldaǵy jospary jóninde málimet berdi. Condor Petroleum kompaniiasynyń prezidenti suiytylǵan tabiǵi gaz óndiretin modýldi zaýyttar salý jospary jóninde málimet berdi. Sonymen qatar, "Qazaqstan - Kanada" iskerlik keńesiniń jumysy aiasynda Qazaqstan men Kanada arasyndaǵy yntymaqtastyqty damytýdyń perspektivalaryna nazar aýdaryldy.
