Memleket basshysy Parlament Májilisiniń tóraǵasy Erlan Qoshanovty qabyldady, - dep habarlaidy "Ult aqparat" Aqordaǵa silteme jasap.
Májilis spikeri Prezidentke depýtattardyń halyqpen ótkizgen kezdesýleriniń qorytyndysy týraly málimet berdi. Májilis depýtattary aldaǵy referendýmnyń jáne Konstitýtsiiaǵa engiziletin ózgeristerdiń mańyzdylyǵyn túsindirý úshin óńirlerge saparmen bardy.
Depýtattar kún saiyn 250-ge deiin is-shara ótkizgen. Eńbek ujymdarynda, bazarlarda, áleýmettik nysandarda jáne shalǵai eldi mekenderde ótken kezdesýlerde turǵyndarmen ashyq pikir almasýǵa basa mán berildi. Jalpy azamattar usynylyp otyrǵan reformalardy qoldaidy jáne referendýmǵa qatysýǵa daiyn.
Jalpyulttyq referendýmǵa qatysty túsindirý naýqanyna AMANAT partiiasy da atsalysqan. Respýblikalyq jáne oblystyq shtabtar, máslihattardyń barlyq deńgeiindegi fraktsiia depýtattary men partiianyń jastar qanaty belsendi jumys istep jatyr.
Májilis depýtattary saparlarynyń barysynda turǵyndardy tolǵandyryp júrgen ózekti máseleler jóninde ashyq pikir almasty. Kóterilgen barlyq másele bekitilgen algoritmge sáikes Úkimetpen birlese júielenip, pysyqtalady.
Erlan Qoshanov Qasym-Jomart Toqaevqa palatanyń zań shyǵarý qyzmeti týraly baiandady. Atap aitqanda, sessiia bastalǵaly beri 64 zań jobasy maquldanǵan jáne 51-i qaralyp jatyr. Olardyń ishinde Memleket basshysynyń tapsyrmalaryn júzege asyrý aiasynda ázirlengen zań jobalary da bar.
Prezidentke Úkimet pen Esep komitetiniń byltyrǵy respýblikalyq biýdjettiń jumsalýy jónindegi esebin qoǵamdyq tyńdaýǵa, sondai-aq sý resýrstary týraly parlamenttik tyńdaýlar ótkizýge daiyndyq jumystarynyń barysy týraly baiandaldy.
Májilis tóraǵasy Prezidentke parlamenttik diplomatiia aiasyndaǵy jumystardy kúsheitý jóninde málimet berdi. Atap aitqanda, mamyrda Jambyl oblysy Qordai aýylyndaǵy shekara zastavasynda Qazaqstan men Qyrǵyzstan parlamentteriniń halyqaralyq ister jáne qorǵanys jónindegi salalyq komitetteriniń birlesken kóshpeli otyrysy ótkizildi. Onda Eýraziialyq ekonomikalyq odaq aiasyndaǵy saýda-ekonomikalyq yntymaqtastyqty, kólik-logistikalyq jáne kedendik rásimderdi jaqsartý máseleleri qarastyryldy.
Maýsym aiynda depýtattar Armeniiadaǵy UQShU Parlamenttik Assambleiasynyń keńesi men Qyrǵyzstandaǵy Túrkitildes elderdiń Parlamenttik Assambleiasy keńesiniń otyrystaryna qatysady dep josparlanyp otyr. Bul jiyndarda zań shyǵarý qyzmeti men sailaýdy baqylaý jónindegi yntymaqtastyqty nyǵaitýdyń perspektivalary talqylanbaq.
