Foto: Aqordanyń baspasóz qyzmeti
Memleket basshysy Qasym-Jomart Toqaev «Taza Qazaqstan» respýblikalyq ekologiialyq aktsiiasy aiasynda uiymdastyrylǵan jalpyqalalyq senbilikke qatysyp, elordadaǵy «Ulytaý» alleiasynda aǵash otyrǵyzdy, dep habarlaidy «Ult aqparat» Aqordanyń baspasóz qyzmetine silteme jasap.
Prezidentpen birge senbilikke volonterler, «Assambleia jastary» uiymynyń ókilderi, elimizdiń ǵylym, kreativti indýstriia, mádeniet, sport salalaryndaǵy belsendi jastar jáne aldaǵy V Dúniejúzilik kóshpendiler oiyndaryna qatysýshylar, Prezidenttik jastar kadr rezerviniń músheleri atsalysyp, jóke aǵashynyń 430 túp kóshetin ekti.
Senbilik barysynda Qasym-Jomart Toqaev jastarmen áńgimelesti. Prezident qoǵamda ekologiia mádenietin qalyptastyrý, tabiǵatty aialaý mańyzdy ekenin atap ótti.
– Shyn máninde, elimizdi kógaldandyrý, abattandyrý – úlken memlekettik mańyzy bar is. Bul búgin shyǵyp, erteń umytyp ketetin birrettik naýqan emes. Atalǵan jumys turaqty túrde júrgiziledi. Týǵan jerimizdi taza ustaýymyz kerek. Bul – jalpyulttyq másele. Qazaqstanymyz taza bolýy qajet. Las elge qonaq retinde, investor retinde eshkim kelmeidi. Biraq, eń aldymen, Qazaqstannyń taza, kórikti bolǵany biz úshin, iaǵni halyq úshin kerek. Bul kúndelikti ómir saltyna ainalýy qajet. Sondai-aq bul jumys elorda jáne iri qalalarda ǵana emes, shaǵyn qalalarda, aýdandar men aýyldarda da udaiy uiymdastyrylady. Búkil Qazaqstandy taza ustaý ózimizge, jastarǵa bailanysty. Men jastarǵa senemin. Sondyqtan jastarǵa zor úmitpen qaraimyn, – dedi Memleket basshysy.
Prezident zań men tártip ústemdigi bárine qatysty ekenin aityp, vandalizmmen batyl túrde kúresý qajet ekenine nazar aýdardy.
– Biz óz elimizdi maqtan tutýǵa tiispiz. Meili ol kóshe, aýla nemese úilerdiń kireberisi bolsyn, bárine uqypty qaraýymyz qajet. Vandaldarmen tabandy túrde kúresý kerek. Sondai-aq olardyń zań júzinde qatań jazalanatynyn aittym. Ár nárseniń shegi bar. Áitpese, bárin búldirip alyp, keiinnen keshirim suraidy. Elimizde tártip bolýy kerek. Zańdy saqtaý qajet, – dedi Qasym-Jomart Toqaev.
Budan keiin Memleket basshysy Botanikalyq baqty aralap, jalpyqalalyq senbilikke qatysyp jatqan turǵyndarǵa, elordanyń kommýnaldyq sharýashylyq mekemeleriniń qyzmetkerlerine rizashylyǵyn bildirdi.
Buǵan deiin Memleket basshysy «Qazaqstan Respýblikasynyń memlekettik nagradalary týraly» Qazaqstan Respýblikasynyń Zańyna ózgerister men tolyqtyrý engizý týraly» Qazaqstan Respýblikasynyń Zańyna qol qoiǵanyn jazǵan bolatynbyz.
