Aqtóbede qaiyrymdy jandardyń arqasynda anasynan erte aiyrylǵan Úsenovter otbasy baspanaly boldy. Oblys ákimi Ońdasyn Orazalin 4 balanyń asyraýshysy — jalǵyzbasty Amangeldi Zaidýllaevqa 3 bólmeli páter kiltin tapsyryp, balalardyń baspanaly bolýyna atsalysqan azamattarǵa alǵys bildirdi, dep habarlaidy "Ult aqparat".
«Qazaq halqynda «qaiyrymdylyq jasasań, qaiyryn óziń kóresiń» degen qanatty sóz bar. Qaiyrymdylyq jasaý, jabyrqaǵannyń janynan tabylý, sharasyzǵa kómek qolyn sozý – halqymyzdyń qanyna bitken asyl qasietteriniń biri. Búgingi shara, bizdiń bolashaǵymyz – balalar úshin jasalyp jatqan igi is. Atalǵan másele memleket basshysynyń tikelei baqylaýynda. Bizdiń mindetimiz - balanyń júzinen kúlki, júreginen qýanysh ketpeitin ómir syilaý. «Hareket» qaiyrymdylyq qory, «Nektar» qurylys kompaniiasy, barlyq kómek qolyn sozǵan qairymdy azamattardyń arqasynda bir otbasy baspanaly boldy»,-dep atap ótti Ońdasyn Orazalin.
Kópbalaly otbasy buǵan deiin Amangeldi Zaidýllaevtyń aǵasynyń menshigindegi shaǵyn úide turyp kelgen.
Qiyn jaǵdaida qalǵan búldirshinderdiń máselesin sheshý maqsatynda óńir basshysy jetekshi qurylys kompaniialarymen kelissóz júrgizdi. Nátijesinde «Nektar» qurylys kompaniiasynyń basshysy Shamil Kaspranov jańasha úlgide salynǵan, aýmaǵy 93 sharshy metr bolatyn úsh bólmeli páterdi jeńildetilgen baǵamen usyndy.
«Nektar» turǵyn úi kesheninde ornalasqan jańa páterdiń ishine qajetti múlik satyp alyp berýge óńirdegi iri kásiporyndar da atsalysty.
«Ais» JShS quryltaishysy Marat Itegýlov, «Kásipkerlerdiń quqyǵyn qorǵaý qaýymdastyǵy» ZTB tóraǵasy Talǵat Hamitov, «Qazaqstannyń saýda jáne qyzmet kórsetý salasy kásiporyndary naryqtarynyń Qaýymdastyǵy» zańdy tulǵalar birlestiginiń Aqtóbe filialynyń direktory Dmitrii Dovmatenko, etnodizainer, «Altyn Orda» avtorlyq úiiniń negizin qalaýshy Yrza Tursynzada, «Mektepke deiingi uiymdardyń Qazaqstandyq assotsiatsiiasy» Aqtóbe filialy tóraiymy N.Kaiýdina jáne Aqtóbe qalasyndaǵy barlyq jekemenshik balabaqshalardyń quryltaishylary, Aqtóbe oblysy boiynsha «Áielder qaýymdastyǵynyń» jetekshisi Kúlshat Masalimova, QHA janyndaǵy analar keńesi tóraiymy Jumabike Shamshadinova, mektep muǵalimderi turmysqa qajetti buiymdarmen qamtamasyz etilýine qarjylai kómek kórsetti.
Úsenovter otbasyna buǵan deiinde memleket tarapynan túrli aktsiialar aiasynda qoldaýlar kórsetilip keldi.
