Prezidenttiń tapsyrmasymen mektepter salýǵa bólinetin 20 mlrd teńgeni kei óńirler jol salýǵa jumsaǵysy keledi. Bul týraly QR Premer-Ministriniń orynbasary Eraly Toǵjanov aitty, dep habarlaidy QazAqparat.
«Memleket basshysynyń tapsyrasyna sáikes, «Aýyl – el besigi» baǵdarlamasy aiasynda batys jáne ońtústik óńirlerde bilim berý, mádeniet, sport nysandaryn salý úshin qosymsha 20 mlrd teńge bólý josparlanǵan. Bir aptanyń ishinde ákimdermen birlesip, atalǵan óńirlerde bilim berý nyandaryn salý josparyn ázirleý qajet. Úsh aýysymdy jáne apatty mektepter problemasyn sheshýge airyqsha nazar aýdarý kerek», - dedi Úkimet basshysynyń orynbasary Bilim jáne ǵylym ministrliginiń keńeitilgen alqa otyrysynda.
Osy rette vitse-premer bul máseleniń bári jaidan-jai kóterilip otyrmaǵandyǵyn basa aitty.
«Ásirese, óńirlerge qatysty másele kúntártibinde tur. Ótkendegi jaǵdailar kóz aldaryńyzda boldy. Osy máselelerdiń barlyǵyn túbegeili eskerýimiz qajet. Sondyqtan Prezidenttiń qosymsha 20 mlrd teńge bólýge qatysty sheshimine orai keshe otyrys ótkizdim. Sonda aimaqtar jolǵa, infraqurylymǵa qatysty usynystar bergeni men úshin túsiniksiz. Keshe qatty áńgime boldy. Sondyqtan osy máseleni qysqa ýaqyttyń ishinde Prezidenttiń naqty kórsetken tapsyrmasyna sáikes sheshý joldaryn qaraýlaryńyzdy suraimyz. Ýaqyt joq. Eki kúnniń ishinde sheshýge tapsyrma berdim. Osy máselege de ministrlik erekshe qaraý kerek. Aimaqtarǵa bailanysty sheshimderdi qysqa ýaqyttyń ishinde qabyldaýymyz qajet», - dedi Eraly Toǵjanov.
