QR Qylmystyq kodeksine «qylmysqa arandatý» degen bap engiziledi. Bul týraly QR Sybailas jemqorlyqqa qarsy is-qimyl agenttigi tóraǵasynyń birinshi orynbasary Oljas Bektenov aitty, dep habarlaidy QazAqparat.
«Memleket basshysynyń 2019 jylǵy 2 qyrkúiektegi Qazaqstan halqyna Joldaýynda aitylǵan tapsyrmasyn oryndaý úshin Zańda jedel-izdestirý qyzmetin nemese sotqa deiingi tergep-tekserýdi júzege asyratyn laýazymdy adamdardyń qylmystardy arandatqany úshin qylmystyq jaýapkershilik kózdelgen. Qylmystyq kodekske «qylmysqa arandatý» degen 412-1-bap engiziledi. Ol tek paraqorlyqpen shektelmei, kez kelgen qylmysty qamtityn bolady. Bul rette, jedel-izdestirý qyzmetin nemese sotqa deiingi tergep-tekserýdi júzege asyratyn laýazymdy adamnyń keiinnen áshkereleý jáne qylmystyq jaýapqa tartý nemese bopsalaý maqsatynda adamdy qylmys jasaýǵa kóndirgen zańsyz áreketteri, qylmystyń arandatýyna jatady», - dedi ol Ortalyq kommýnikatsiialar qyzmetindegi baspasóz máslihatynda.
Onyń aitýynsha, atalǵan bap áreketterdiń aýyrlyǵyna jáne saldaryna bailanysty úsh bólikten turady. Zańsyz áreketterdiń zorlyq-zombylyqpen ne kúsh qoldaný áreketimen ushtasqanyna, múliktiń joiylýyna nemese búlinýine ákep soqqanyna ne adamnyń materialdyq nemese ózge de táýeldiligin paidalana otyryp jasalǵanyna, qylmystyq toptyń múddelerinde jasalǵanyna ne olar ózge de aýyr zardaptarǵa ákep soqqanyna qarai jaza taǵaiyndalatyn bolady. Jazanyń eń tómengi merzimi – 7 jylǵa deiingi merzimge belgili bir laýazymdardy atqarý nemese belgili bir qyzmetpen ainalysý quqyǵynan aiyra otyryp, 3 jyl bas bostandyǵynan aiyrý. Eń joǵarǵy sanktsiia – belgili bir laýazymdardy atqarý nemese belgili bir qyzmetpen ainalysý quqyǵynan 10 jyl merzimge aiyra otyryp, 12 jylǵa bas bostandyǵynan aiyrý.
«Osy túzetýdi qabyldaý, azamattardyń konstitýtsiialyq quqyqtaryn qorǵaýdy kúsheitýge yqpal etedi. Laýazymdy tulǵalardyń zańsyz is-áreketterine qosymsha tosqaýyl bolady», - dedi Oljas Bektenov.
