Elimizde qurylys materialdary baǵasynyń 15%-ǵa arzandaýy kútilýde. Bul týraly QR Indýstriia jáne infraqurylymdyq damý birinshi vitse-ministri Qaiyrbek Óskenbaev aitty, dep habarlaidy QazAqparat.
«Qurylys materialdary baǵasynyń negizsiz ósýin tómendetý maqsatynda «Marketpleis» atty arnaiy aqparattyq alań qurý kózdelip otyr. Iaǵni, otandyq qurylys materialdaryn onlain satý alańy. Memlekettiń qoldaýymen qurylys materialdaryn satýǵa arnalǵan onlain saýda alańy belgilengen baǵany ustap turýǵa múmkindik beredi. Bul óz kezeginde baǵanyń 15 paiyzǵa arzandaýyna jáne qurylys materialdary naryǵynyń ashyqtyǵyn qamtamasyz etedi», - dedi Q. Óskenbaev OKQ-de ótken baspasóz máslihatynda.
Vitse-ministrdiń málimdeýinshe, ótken jyly «Nurly jer» memlekettik baǵdarlamasy aiasynda qurylys materialdaryn óndirýshiler men qurylys kompaniialaryna arnalǵan www.stroimaterial.kz saity iske qosyldy.
«Atalǵan sait «Nurly jer» memlekettik baǵdarlamasy aiasynda júzege asyrylǵan birinshi joba, al endi qolǵa alynǵan «Marketpleis» sonyń jalǵasy, ekinshi kezeń deýge bolady. Bul onlain saýda alańynda óndirýshiler óz ónimderin usyna alady. Onda barlyq protsess onlain túrde júrgiziledi, iaǵni kelisimsharttar ETsQ (elektrondy tsifrlyq qoltańba) kómegimen jasalady. Sondai-aq, logistikalyq kompaniialardyń taýardy jetkizýin baqylaityn arnaiy fýnktsiia iske qosylatyn bolady», - deidi ol.
