Bilim jáne ǵylym ministrligi 2021-2022 oqý jylyna bilim granttaryn bólý kezinde halyqtyń áleýmettik osal toptaryna kvotalar bóldi, dep habarlaidy "Ult aqparat" Bilim jáne ǵylym ministrligine silteme jasap.
Vedomstvo baspasóz qyzmetiniń málimetinshe, Prezidenttiń tapsyrmasyna sáikes bul shara alǵash ret qarastyrylǵan.
Endi kópbalaly nemese tolyq emes otbasylardan shyqqan balalar, sondai-aq erekshe qajettilikteri bar balalardy tárbielep otyrǵan otbasylardaǵy talapkerlerdiń grant alý múmkindigi joǵarylai tústi.
«Bilim jáne ǵylym ministrligi Prezidenttiń tapsyrmasy boiynsha halyqtyń áleýmettik osal toptarynan shyqqan balalardyń memleket esebinen bilim alýyna múmkindiktiń kóbirek bolýy úshin jumys júrgizdi. Kámeletke tolmaǵan tórt jáne odan kóp bala tárbielep otyrǵan otbasylardaǵy balalar úshin granttardyń jalpy sanynyń 5%-y, keminde úsh jyl tolyq emes otbasy mártebesi bar otbasylardan shyqqan balalarǵa – 1%, I, II toptaǵy múgedek balalardy tárbielep otyrǵan otbasylardan shyqqan túlekterge bilim berý granttarynyń 1%-y kózdelgen. Bul rette olardyń UBT nátijeleri shekti balǵa sáikes kelýi tiis», – dep habarlady Bilim jáne ǵylym vitse-ministri Qýanysh Erǵaliev.
Sonymen qatar kvota sheńberindegi granttar jetim balalar men etnikalyq diaspora ókilderi úshin de bólingen. Osylaisha, azamattardyń áleýmettik osal sanattaryndaǵy talapkerler bilim berý granttaryn berý kezinde basymdyqqa ie bolady. Máselen, eger pedagogika mamandyqtaryna 8 myńǵa jýyq bilim granty bólinse, onyń ishinde 1 063 grant halyqtyń áleýmettik osal toptaryndaǵy azamattar úshin kózdelgen.
Ulttyq qoǵamdyq senim keńesiniń úshinshi otyrysynda QR Prezidenti Qasym-Jomart Toqaev memlekettik bilim granttaryn bólý júiesinde aýqymdy áleýmettik quramdy qarastyrý kerektigin jáne talapkerdiń akademiialyq jetistikterine ǵana emes, sondai-aq onyń áleýmettik-ekonomikalyq mártebesine de nazar aýdarýdy tapsyrǵanyn aita ketken jón.
