QR Premer-Ministriniń orynbasary Roman Skliar múddeli memlekettik organdar men óńir ákimdikteri ókilderiniń qatysýymen mal azyǵyn daiyndaý máseleleri boiynsha shuǵyl keńes ótkizdi. Bul týraly Aýyl sharýashylyǵy ministrligi habarlady.
Aýyl sharýashylyǵy ministrliginiń usynysy boiynsha Úkimet shóp shabý naýqanyna arzandatylǵan janar-jaǵarmaiǵa qosymsha kólemin bólýge oblys ákimdikteriniń ótinimderin maquldaý týraly sheshim qabyldady. Osy aptada óńirlerge JJM jetkizý kestesin bekitý josparlanýda. Oblys ákimdikterine fermerlerge 43,6 myń tonna jeńildetilgen janar-jaǵarmai jetkizýdi baqylaý tapsyryldy.
«Qazaqstan temir joly» UK» AQ 2021 jyldyń 31 shildesine deiin shóp tasymaldaý úshin respýblikanyń barlyq aýmaǵynda ýaqytsha jeńildikter usyndy. Tasymaldaý quny 77%-ǵa tómendetildi. Bul shara batys óńirlerge qosymsha mal azyǵyn jyldam jetkizýge múmkindik beredi.
Jiyn barysynda mal jáne qus sharýashylyqtary úshin jem-shóp qoryn qalyptastyrý maqsatynda jemdik astyqty qosymsha satyp alý týraly usynys qaraldy. Qazir qarjylandyrý kózderi týraly másele zerttelýde.
Shaǵyn jáne orta fermerlik sharýashylyqtarda jem-shóp óndirisin yntalandyrý maqsatynda fermerlerge jem-shóp daiyndaý tehnikasy men sýarýdyń utqyr júielerin satyp alý úshin «Báiterek» holdingine qosymsha qarjylandyrýdyń tetikterin ázirleý tapsyryldy.
Óńirlerdiń ákimdikterine mal azyǵy baǵasynyń qoljetimdi bolýyn turaqty baqylaý jáne aýyl sharýashylyǵy óndirýshilerimen jáne qurama jem kásiporyndarymen jemdi qoljetimdi baǵamen satý týraly memorandým jasasý tapsyryldy.
