Alańdaǵy beibit sherýge qatysyp, ustalyp, biraq eshqandai aiyby joq 1083 adam bosatyldy. Bul týraly QR Bas prokýratýrasy birinshi qyzmet basshysynyń orynbasary Eldos Qilymjanov málim etti, dep habarlaidy QazAqparat.
«Prezidenttiń aýyrlatatyn mán-jai bolmaǵanda jazany jeńildetý týraly tapsyrmasyna sáikes biraz jumys atqaryldy. Jalpy sotta Qańtar oqiǵasyna qatysty 9213 ákimshilik is qaraldy. Sot sheshimine sáikes shyn ókingen jáne mán-jaidyń jeńildigin eskere otyryp 4561 tulǵaǵa eskertý jasaldy. Sonymen qatar prokýrorlardyń ótinish-hatynyń negizinde 1083 adam qamaýdan bosatylyp, 490 aiyppul jazasy eskertýge aýystyryldy. Odan bólek 386 ákimshilik is quqyqbuzýshylyq quramnyń bolmaýyna bailanysty toqtatyldy», - dedi Eldos Qilymjanov OKQ-de ótken baspasóz máslihatynda.
Prokýratýra ókiliniń aitýynsha, jappai ereýilge qatysty ár is jiti qaralyp jatyr.
«Qazirgi ýaqytta 362 adam ákimshilik qamaýǵa alynyp, 1245 tulǵaǵa aiyppul salyndy. Sol siiaqty prokýrorlardyń ákimshilik jazany jeńildetý týraly 298 ótinish-haty sotta qaralýda. Osyǵan uqsas jumystardy, onsha aýyr emes jáne aýyrlyǵy ortasha qylmystyq ister boiynsha júrgizemiz», - deidi ol.
