Foto: Aqorda
Qasym-Jomart Toqaev tek memleketten bólinetin qarajatqa qarap otyratyn sport federatsiialarynyń basshylaryn synǵa aldy, dep habarlaidy Ult.kz.
Aitýynsha, búgingi tańda sport federatsiialary abyroi-bedel jinaityn qurylymǵa ainalǵan. Kóptegen federatsiiany iri biznes ókilderi jáne memlekettik mekeme basshylary basqaryp otyrǵanymen, kásipkerler osy qoǵamdyq mańyzy bar iske óz qarjysyn salýǵa qulyqsyz, tek memleketten bólinetin qarajatqa qarap otyrady.
"Memlekettik qyzmetshiler de osy joǵary qoǵamdyq laýazymdardy ózin «jarnamalaý» quraly retinde kóredi, iaǵni sporttyń mánisine tereń boilamaidy. Tipti, sportshylardyń jetistigin ózderiniń jeke jeńisi dep sanaityndar bar. Mundai teris, jaǵymsyz úderiske tosqaýyl qoiý kerek. Osy másele boiynsha jan-jaqty taldaý júrgizý qajet. Bul jumysty Prezident Ákimshiligine tapsyramyn", – dedi Prezident.
Memleket basshysynyń paiymdaýynsha, sport jáne dene shynyqtyrýǵa qoldaý kórsetýdi qurmetti qoǵamdyq missiia jáne úlken azamattyq jaýapkershilik retinde qarastyrǵan jón.
"El ishinde jáne shetelde ataq-abyroiyńdy asqaqtatý úshin federatsiia basqarý durys emes. Oǵan jol berýge bolmaidy. Sondyqtan memleket kásipkerlerdi, sonyń ishinde iri biznesmenderdi qoldaidy. Biraq memleket pen qoǵam da olardyń osyǵan sai áreket etkenin kútedi. Atap aitqanda, bul sportty, mysaly fýtboldy kommertsiialandyrý máselesine qatysty. Týrizm jáne sport ministrligi men sport federatsiialarynyń arasynda teń quqyly dialog órbip, mindetteri men quzyretteri naqty aiqyndalǵan yntymaqtastyq jolǵa qoiylýǵa tiis", - deidi Prezident.
Qasym-Jomart Toqaev qazir birqatar sport federatsiiasyna biznesmenderdiń, metsenattardyń jańa býyny kele bastaǵanyn aitty. Olarǵa sportty damytý salasyndaǵy jaǵdaidy jaqsartý mindeti júktelip otyr.
