Foto: Aqorda
Astanadaǵy sammitte sóilegen sózinde Qasym-Jomart Toqaev Shanhai yntymaqtastyq uiymyn reformalaý jáne jańǵyrtý qajettigine arnaiy toqtaldy, dep habarlady Aqorda.
Ol qarqyndy jahandyq ózgeristerge bailanysty ShYU qyzmetin odan ári jetildirýge baǵyttalǵan mańyzdy mindet turǵanyn atap ótti.
"Uiym aiasynyń keńeiý úderisi jańa múmkindikterge jol ashyp, ony damytýǵa tyń serpin beredi. Elimiz ShYU-ǵa tóraǵa retinde Uiymdy yntymaqtastyqtyń budan da tiimdi ári kópjaqty mehanizmine ainaldyrýdy kózdeitin teńgerimdi usynystaryn ortaǵa saldy. Atap aitqanda, biz ShYU Hatshylyǵy men Bas hatshynyń rólin kúsheitýdi quptaimyz", – dedi Qasym-Jomart Toqaev.
Qazaqstan prezidenti aitylǵan barlyq usynys ShYU-ǵa múshe elderge ortaq igi maqsattarǵa qol jetkizýge barynsha úles qosýǵa degen shynaiy nietten týyndaǵanyn málimdedi.
Memleket basshysy sózin qorytyndylai kele, qoldaǵandary úshin uiymǵa múshe elderdiń basshylaryna rizashylyǵyn bildirdi. Sonymen qatar Qytai Halyq Respýblikasynyń tóraǵasy Si Tszinpindi ShYU-ǵa múshe memleketter basshylarynyń keńesine tóraǵa bolýymen shyn júrekten quttyqtap, Qytai tarapyna tabys tiledi.
Qasym-Jomart Toqaev kópjaqty yntymaqtastyqty ilgeriletý jónindegi aýqymdy máseleler talqylanǵanyn, uiymdy odan ári damytý baǵyty aiqyndalǵanyn aitty.
"Biz Shanhai yntymaqtastyq uiymynyń kelesheginen úmit kútemiz. Qazir biz qol qoiatyn qujattar ShYU aiasyndaǵy yntymaqtastyqtyń jańa kezeńine jol ashatynyna, uiymnyń júieli ári jan-jaqty damýyna septigin tigizetinine senimdimin", – dedi Qazaqstan prezidenti.
