Memleket basshysy Shyǵys Qazaqstan oblysynyń ákimi Danial Ahmetovti qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Prezidentke Shyǵys Qazaqstan oblysynyń jyl basynan bergi áleýmettik-ekonomikalyq damýy jóninde esep berildi.
Kezdesý barysynda óńirdiń infraqurylymdyq damý máselelerine erekshe nazar aýdaryldy. Osy rette, Qasym-Jomart Toqaevqa Buqtyrma sý qoimasy arqyly ótetin kópirdiń qurylysy boiynsha berilgen tapsyrmalarynyń oryndalýy, sondai-aq ekinshi jarty jyldyqqa josparlanǵan Semei qalasyndaǵy júk tasityn kólikterge arnalǵan kópirdiń qaita jóndelý barysy baiandaldy. Odan bólek, Danial Ahmetov Prezidentke Óskemen jáne Úrjar qalalaryndaǵy áýejailardy qaita jóndeý jumystary týraly aqparat berdi. Áýejailardy jańǵyrtý jumystary biyl jyl sońyna deiin aiaqtalady.
Qasym-Jomart Toqaev halyqtyń áleýmettik az qamtylǵan tobyna arnalǵan turǵyn úiler men infraqurylymdardyń qurylysyn jyldamdatý qajet ekenin aitty. Ákimniń aitýynsha, 2020 jyly jaǵdaiy tómen jáne kópbalaly analarǵa 1 049 páter men úi berilse, al osy jyldyń sońyna deiin olarǵa qosymsha taǵy 1 125 baspana beriledi.
Kezdesýde kóterilgen taǵy bir másele – agrarlyq sektordyń eksporttyq áleýetin nyǵaitý perspektivalary. Danial Ahmetov Memleket basshysyna jylyna 300 myń tonna ónim shyǵaratyn maily daqyldardy qaita óńdeý zaýytyn iske qosý jáne aýyl sharýashylyǵy ónimderiniń óndirisin odan ári keńeitý josparyn tanystyrdy.
Odan bólek, óńirdiń indýstrialdy-innovatsiialyq damý máseleleri sóz boldy. Danial Ahmetov Aqtoǵai taý-ken baiytý kombinaty qurylysynyń ekinshi kezeńi týraly málimet berdi.
Prezident kezdesý qorytyndysy boiynsha Shyǵys Qazaqstan oblysynyń ákimine birqatar tapsyrma berdi.
