QR Prezidenti Qasym-Jomart Toqaev Shveitsariianyń iskerlik toptar ókilderimen kezdesý ótkizdi, dep habarlaidy "Ult aqparat" Aqordanyń resmi saityna silteme jasap.
Jiyndy ashqan Memleket basshysy Shveitsariia qurama komandasynyń fýtboldan ótip jatqan Eýropa chempionatynda jaqsy oiyn órnegin kórsetkenin atap ótti.
Prezident Shveitsariia Konfederatsiiasy Qazaqstannyń Eýropadaǵy mańyzdy saýda-ekonomikalyq seriktesteriniń biri ekenin aitty.
– Elderimiz arasyndaǵy qarym-qatynastar dostyq pen ózara senimge negizdelgen. Búgingi kezdesýdi Shveitsariia Prezidenti Gi Parmelanmen beine bailanys arqyly ótken jýyrdaǵy kelissózdiń konstrýktivti jalǵasy retinde qarastyramyn. Biz saýda bailanystarymyzdy, investitsiialyq yntymaqtastyǵymyzdy nyǵaitý úshin jumys isteýge, atalǵan salalar boiynsha jetistikke qol jetkizýge ýaǵdalastyq. Qazaqstan Táýelsizdigin alǵan ýaqyttan beri Shveitsariia ekonomikamyzǵa 30 milliard dollarǵa jýyq investitsiia saldy. Eki memleket arasyndaǵy taýar ainalymy, tipti, byltyrǵy daǵdarys kezinde 1,7 milliard dollar boldy, – dedi Prezident.
Qasym-Jomart Toqaev búginde Qazaqstanda Shveitsariia kapitalynyń qatysýymen 400-den astam kásiporyn jumys istep jatqanyna toqtaldy.
– Qarym-qatynastarymyz ben yntymaqtastyǵymyzda belgili bir jetistikter bar dep sanaimyn. Sonymen qatar muny odan ári damytý úshin áleýetimiz de jetkilikti. Qazaqstan tikelei investitsiia tartý úshin elimizdegi investitsiialyq klimattyń meilinshe qolaily bolýyna barlyq múmkindikti jasaidy. Qazaqstan – aimaqtaǵy ekonomikasy eń iri memleket. Bizdiń maqsatymyz – aimaqtaǵy jetekshilik ornymyzdy saqtap qalý. Sonymen qatar ekonomikamyzdy ártaraptandyrýǵa bailanysty máselelerdi sheshýimiz kerek, – dedi Qasym-Jomart Toqaev.
Prezidenttiń aitýynsha, Qazaqstanda ekonomikany kómirteginen ada etýge, jasyl tehnologiialarǵa, qorshaǵan orta men qarjy salasyn qorǵaýǵa bailanysty jobalarǵa basymdyq beriledi.
Kezdesý barysynda Stadler Rail AG kompaniiasynyń prezidenti, Qazaqstan men Shveitsariia iskerlik keńesiniń teń tóraǵasy Peter Shpýler, Glencore International AG kompaniiasynyń bas direktory Aivan Glazenberg, Roche Holding kontserniniń basqarma tóraǵasy Kristof Frants, Credit Suisse Switzerland investitsiialyq bólimshesiniń basshysy Iens Haas, ABB Switzerland kompaniiasynyń bas direktory Robert Ichner, KS Genetics kompaniiasynyń prezidenti Filippo Lombardi, INOKS Capital kompaniiasynyń bas atqarýshy direktory Nabil Abdýl-Massih jáne Rey Group kompaniiasynyń prezidenti Kristian Rei sóz sóiledi.
