QR Ortalyq sailaý komissiiasy otyrysynda kezekten tys prezident sailaýynyń túpkilikti qorytyndysy jariialandy, dep habarlaidy QazAqparat.
QR OSK tóraǵasy Nurlan Ábdirovtiń dereginshe, Qasym-Jomart Toqaevqa 6 mln 456 myń 392 sailaýshy nemese olardyń 81,31%-y daýys bergen. «Bárine qarsymyn» baǵanyn 460 484 nemese 5,8% sailaýshy tańdaǵan.
Sonymen birge, Jigýli Dairabaevqa 271 641 nemese 3,42 paiyz, Qaraqat Ábdenge 206 myń nemese 2,6 paiyz, Meiram Qajykenge 200 907 nemese 2,53 paiyz, Nurlan Áýesbaevqa 176 116 nemese 2,22 paiyz jáne Saltanat Tursynbekovaǵa 168 731 nemese 2,12 paiyz daýys berilgen.
Naqtylanǵan sailaýshylar tizimderine sai, jalpy sailaýshylar sany 11 mln 953 myń 465 adamdy qurady. Onyń 8 mln 300 myń 46 adamy nemese 69,44 paiyzy daýys berýge arnalǵan biýlletenderdi aldy. Daýys berý kúni QR Prezidenttigine kandidattardyń 11 myńnan asa senim bildirgen adamdary, sheteldik halyqaralyq uiymdardyń 641 baiqaýshysy, saiasi partiialardyń 15,5 myńnan asa baiqaýshysy, qoǵamdyq birlestikterden 30 myńnan asa baiqaýshy sailaýdy baqylaýdy júrgizdi. Sailaý ýchaskelerinde 1225 qazaqstandyq BAQ ókilderi, 23 eldiń 41 sheteldik BAQ-tyń akkredittelgen jýrnalisteri aqparat taratty.
Aita keteiik, 20 qarashada elimizde kezekten tys prezident sailaý ótti. Barlyq óńirde 10 033 ýchaske jumys istedi. Al shet memleketterdegi Qazaqstan ókildikteri janynda 68 ýchaske qurylǵan.
Elimizdegi búkil sailaýshylardyń 69 paiyzy nemese 8 mln 282 myńnan astam adam óz tańdaýyn jasady.
«Osylaisha, sailaýdyń keshe jariialanǵan aldyn ala qorytyndylary resmi kelip túsken hattamalarmen rastaldy. QR-daǵy sailaý týraly Konstitýtsilyq zańnyń 9-baby 1-tarmaǵyna, 65-babyna sáikes, daýys berýge qatysqan sailaýshylardyń 50 paiyzdan astamynyń daýysyn alǵan kandidat respýblika prezidenti bolyp sanalady. Osylaisha, 2022 jylǵy 20 qarashadaǵy kezekten tys sailaýda Qasym-Jomart Kemeluly Toqaev QR Prezidenti bolyp sailandy», - dedi Nurlan Ábdirov.
