Ortalyq sailaý komissiiasy Qazaqstan prezidenttigine úmitkerge qoiylatyn talaptardy atady, dep habarlaidy Sputnik Qazaqstan tilshisi.
Kandidattardy usyný 10 sáýirde bastalyp, 28 sáýirde saǵat 18:00-de aiaqtalady.
Ortalyq sailaý komissiiasy Qazaqstan prezidenttigine kandidattardyń zańnama talaptaryna sáikestigi týraly qaýlyny bekitti.
"Sailaý týraly" konstitýtsiialyq zańǵa sáikes, myna adamdar prezidenttikke kandidat bola almaidy:
- zańda belgilengen tártippen ótelmegen nemese alynbaǵan sottylyǵy bar adam;
- sot sybailas jemqorlyq qylmysyn jáne sybailas jemqorlyq zań buzýshylyǵyn jasaǵany úshin kinásin zańda belgilengen tártippen tanyǵan adam.
- sottyń áreketke qabiletsiz dep tanyǵan, sondai-aq sot úkimi boiynsha bas bostandyǵynan aiyrý oryndarynda otyrǵan azamattardyń sailanýǵa quqyǵy joq.
Sonymen qatar, Ortalyq sailaý komissiiasy prezidenttikke kandidattarǵa qoiylatyn talaptardy taǵy bir márte eske saldy.
Týmysynan Qazaqstan azamaty, qyryq jasqa tolmaǵan, memlekettik tildi meńgergen, Qazaqstanda sońǵy on bes jylda turatyn jáne joǵary bilimi bar respýblika azamaty sailaýǵa túse alady. Konstitýtsiialyq zańda prezidenttikke kandidatqa qosymsha talaptar qoiylýy múmkin.
Buǵan qosa, prezident bolyp sailaný úshin azamattyń memlekettik qyzmette nemese sailanbaly memlekettik laýazymdarda keminde 5 jyl jumys tájiribesi bolýy, sondai-aq belsendi sailaý quqyǵy bolýy tiis.
Konstitýtsiiada jáne "Sailaý týraly" konstitýtsiialyq zańda kandidattardyń qoiylatyn talaptarǵa sáikestigin tekserý tártibi kórsetilgen.
Aldymen, respýblikalyq qoǵamdyq birlestiktiń joǵary organynyń otyrysy ótip, kandidatty usyný týraly hattamasynan úzindi kóshirme jasalady.
Qujat kandidattyń daýysqa túsýge kelisim berýi týraly ótinishimen birge Ortalyq sailaý komissiiasyna tapsyrylady. Kandidattyń sailaý jarnasyn engizgenin kýálandyratyn qujatty da tapsyrý kerek. Úmitkerdiń qoiylatyn talaptarǵa sai bolýy bes kún ishinde anyqtalady.
Kandidattyń daýysqa túsýge kelisimi týraly nysany Ortalyq sailaý komissiiasynyń 10 sáýirdegi nysanymen bekitilgen. Ótinishke úmitkerdiń ómirbaiany, memlekettik qyzmettegi nemese sailanbaly memlekettik laýazymdardaǵy jumys tájiribesi týraly málimetter, sailaý jarnasynyń engizilgenin kýálandyratyn qujat qosa beriledi.
Kandidat Ortalyq sailaý komissiiasynyń shotyna zańnamada belgilengen eń tómengi jalaqynyń elý eselengen mólsherinde sailaý jarnasyn engizedi.
Qujattardyń tolyq paketi bolǵan kezde, Ortalyq sailaý komissiiasy olardy qaraýǵa qabyldaidy.
