Alda ótetin Prezident sailaýynda qoǵamdyq saýalnama júrgizetin 2 uiym Ortalyq sailaý komissiiasyna qujattaryn tapsyrdy, - dep habarlaidy "Ult aqparat".
"7 qazanda Ortalyq sailaý komissiiasyna qoǵamdyq saýalnama júrgizý úshin "Qoǵamdyq pikir" zertteý institýty ("Obshestvennoe mnenie" zertteý institýty) men AMANAT partiiasynyń Qoǵamdyq saiasat institýty jekemenshik mekemesinen ótinish tústi", - delingen QR OSK habarlamasynda.
Ortalyq sailaý komissiiasy qoǵamdyq pikirge suraý salýdy Qazaqstan Respýblikasynyń zańnamasyna sáikes tirkelgen, qoǵamdyq pikirge saýal salýdy júrgizý boiynsha keminde bes jyl tájiribesi bar zańdy tulǵalar tiisti qujattardyń kóshirmelerin qosa berip, bul týraly Ortalyq sailaý komissiiasyn jazbasha túrde aldyn ala habardar ete otyryp, júrgizýge quqyly ekenin eske salady.
Ortalyq sailaý komissiiasyna jiberiletin habarlamada saýal salýdy júrgizýge qatysatyn jáne osy salada jumys tájiribesi bar mamandar týraly, qoǵamdyq pikirge saýal salý júrgiziletin óńirler týraly, qoldanylatyn taldaý ádisteri týraly málimetter kórsetiledi.
Sondai-aq, qoǵamdyq pikirge saýal salý nátijelerin, sailaý, sailaýǵa bailanysty ózge de zertteýler, kandidattardy ne saiasi partiialardy qoldap daýys berý nátijeleriniń boljamdaryn daýys beriletin kúnniń aldyndaǵy bes kún ishinde jáne daýys beriletin kúni Internet jelisinde jariialaýǵa jol berilmeitinine nazar aýdaramyz. (Konstitýtsiialyq zańnyń 28-babynyń 9-tarmaǵy).
Zańnyń bul talaptary sailaý naýqanyn daiyndaý jáne ótkizý kezeńinde ótkiziletin qoǵamdyq pikirge saýal júrgizýdiń barlyq túrlerine qoldanylady.
