© Sputnik / Vladislav Vodnev
Ortalyq sailaý komissiiasy tóraǵasynyń orynbasary Konstantin Petrov kezekten tys Prezident sailaýyna qatysý úshin kandidattar usyný qashan bastalatynyn málimdedi, - dep habarlaidy "Ult aqparat".
"Ózderińiz biletindei, keshe Qazaqstan Respýblikasynyń kezekten tys Prezident sailaýyn 2022 jylǵy 20 qarashaǵa taǵaiyndaý týraly Jarlyqqa qol qoiyldy. Jarlyq alǵashqy resmi jariialanǵan kúninen bastap kúshine enedi.
Búgin ol "Kazahstanskaia pravda" men "Egemen Qazaqstanda" jariialanady. Iaǵni, búginnen bastap qaýly kúshine endi. Prezidenttikke kandidattardy usyný sailaý belgilengen kúnnen keiingi kúni, iaǵni 23 qyrkúiekten bastalyp, biylǵy 11 qazanynda saǵat 18:00-de aiaqtalýy tiis", - dedi Petrov.
Ol sailaý týraly Konstitýtsiialyq zańnyń 55-baby 1-tarmaǵyna sáikes prezidenttikke kandidattar usyný quqyǵy belgilengen tártippen tirkelgen respýblikalyq qoǵamdyq birlestikterge tiesili ekenin túsindirdi. Usyný týraly sheshim respýblikalyq qoǵamdyq birlestiktiń joǵary organy músheleriniń jalpy sanynyń kópshilik daýysymen qabyldanady.
Kandidattardyń Konstitýtsiia jáne "Sailaý týraly" Konstitýtsiialyq zań talaptaryna sáikestigin OSK tiisti qujattar usynylǵan kezden bastap bes kún ishinde anyqtaidy.
Ol úshin kandidattar myna qujattardy usynýy kerek:
- respýblikalyq qoǵamdyq birlestiktiń joǵary organy otyrysynyń kandidatty usyný týraly hattamasynan úzindi kóshirme;
- kandidattyń daýysqa túsýge kelisim berýi týraly ótinishi;
- kandidattyń sailaý jarnasyn engizgenin rastaityn qujattar.
