Saraishyqtyń mańyzdylyǵy men tanymaldyǵyn arttyrý úshin zamanaýi týrizm infraqurylymy qajet. Bul týraly búgin Atyraý oblysynyń áleýmettik-ekonomikalyq damý máseleleri jónindegi keńeste Memleket basshysy Qasym-Jomart Toqaev aitty, dep habarlaidy "Ult aqparat".
«Atyraý óńirinde qasterli ári tarihi oryndar kóp. Sonyń biri – ejelgi Saraishyq qalasy boi kótergen jer. Altyn Orda dáýirinde mańyzdy ról atqarǵan shahardyń Qazaqstan aýmaǵynda ornalasýy tegin emes. Bul tól tarihymyzdyń tamyry tereń ekenin kórsetedi. Bizdiń babalarymyz qala salyp, jańa mádenietke jol ashqan. Áigili Saraishyq – sonyń aiqyn dáleli. Munda Altyn Orda dáýiriniń handary jáne qazaqtyń uly hany Qasym han jerlengeni belgili. Jalpy, ulan-baitaq jerimizdegi kóne shaharlardy, memlekettigimizdiń tarihynda airyqsha orny bar Altyn Ordany jan-jaqty zerttep, ǵylymi aqparattyq jumystardy júieli júrgizý kerek. Sol arqyly eldik shejiremizdi keńinen tanyta alamyz. Osyny jas urpaqtyń sanasyna sińirýimiz kerek», - dedi Memleket basshysy.
QR Prezidenti Saraishyqtyń mańyzdylyǵy men tanymaldyǵyn arttyrý úshin zamanaýi týrizm infraqurylymy qajet ekendigin basa aitty.
«Ákimdik Úkimetten vizit-ortalyq qurylysyna qarajat suraǵan eken. Biraq, kelisimin áli almaǵan. Úkimetke osy máseleni dereý sheshýdi tapsyramyn», - dedi Qasym-Jomart Toqaev.
