Foto: Akorda.kz
Memleket basshysy «SANA» oqýshylar saraiyn aralap kórdi, dep habarlaidy "Ult aqparat" Aqordanyń baspasóz qyzmetine silteme jasap.
Bes qabatty zamanaýi ǵimaratta 5-17 jas aralyǵyndaǵy jetkinshikterge arnalǵan 60-tan astam úiirme men sport sektsiialary jumys isteidi. Olar tehnikalyq shyǵarmashylyq, sándik-qoldanbaly óner, áleýmettik ǵylymdar, mýzyka jáne horeografiia, sport sekildi birneshe baǵytqa bólingen. Ortalyq bir mezgilde 700 balany qabyldai alady. Aýmaǵy 7500 sharshy metr ǵimaratta sońǵy úlgidegi tehnologiialarmen jabdyqtalǵan oqý kabinetteri, júzý basseini, akt zaly, podkast jáne foto stýdiialary bar.
Memleket basshysy Lego qurastyrý, robotty tehnika, 3D-modeldeý jáne qysh óneri, urmaly aspaptar, dombyra úiirmesi kabinetteri men júzý basseinin aralap kórdi. Sondai-aq Prezident ortalyqtyń oqytýshylarymen, balalarmen jáne ata-analarmen áńgimelesti.
– Árbir qalada, aýdanda osyndai ortalyqtar ashylýy kerek. Men jaqynda biznes ókilderimen kezdesý ótkizdim. Bul balalar úshin, óskeleń urpaq úshin qajet. Sondyqtan biz bul máselege basa mán beremiz, – dedi Qasym-Jomart Toqaev.
«SANA» jańa urpaq ortalyǵyn «Damu Development Group» konsortsiýmy biznestiń áleýmettik jaýapkershiligi aiasynda salǵan. Kompaniia quryltaishysy Abzal Saǵymbaev aldaǵy ýaqytta birneshe damytý ortalyqtaryn, áleýmettik, densaýlyq saqtaý nysandaryn salý josparlanyp otyrǵanyn jetkizdi.
Astana qalasynyń ákimi Jeńis Qasymbektiń aitýynsha, 2029 jylǵa deiin elordada osyndai 15 oqýshylar saraiy boi kóteredi. Onyń ishinde 5 ortalyqtyń qurylysy jýyq arada bastalady.
