فوتو: Akorda.kz
مەملەكەت باسشىسى «SANA» وقۋشىلار سارايىن ارالاپ كٶردٸ, دەپ حابارلايدى "ۇلت اقپارات" اقوردانىڭ باسپاسٶز قىزمەتٸنە سٸلتەمە جاساپ.
بەس قاباتتى زاماناۋي عيماراتتا 5-17 جاس ارالىعىنداعى جەتكٸنشٸكتەرگە ارنالعان 60-تان استام ٷيٸرمە مەن سپورت سەكتسييالارى جۇمىس ٸستەيدٸ. ولار تەحنيكالىق شىعارماشىلىق, سەندٸك-قولدانبالى ٶنەر, ەلەۋمەتتٸك عىلىمدار, مۋزىكا جەنە حورەوگرافييا, سپورت سەكٸلدٸ بٸرنەشە باعىتقا بٶلٸنگەن. ورتالىق بٸر مەزگٸلدە 700 بالانى قابىلداي الادى. اۋماعى 7500 شارشى مەتر عيماراتتا سوڭعى ٷلگٸدەگٸ تەحنولوگييالارمەن جابدىقتالعان وقۋ كابينەتتەرٸ, جٷزۋ باسسەينٸ, اكت زالى, پودكاست جەنە فوتو ستۋدييالارى بار.
مەملەكەت باسشىسى Lego قۇراستىرۋ, روبوتتى تەحنيكا, 3D-مودەلدەۋ جەنە قىش ٶنەرٸ, ۇرمالى اسپاپتار, دومبىرا ٷيٸرمەسٸ كابينەتتەرٸ مەن جٷزۋ باسسەينٸن ارالاپ كٶردٸ. سونداي-اق پرەزيدەنت ورتالىقتىڭ وقىتۋشىلارىمەن, بالالارمەن جەنە اتا-انالارمەن ەڭگٸمەلەستٸ.
– ەربٸر قالادا, اۋداندا وسىنداي ورتالىقتار اشىلۋى كەرەك. مەن جاقىندا بيزنەس ٶكٸلدەرٸمەن كەزدەسۋ ٶتكٸزدٸم. بۇل بالالار ٷشٸن, ٶسكەلەڭ ۇرپاق ٷشٸن قاجەت. سوندىقتان بٸز بۇل مەسەلەگە باسا مەن بەرەمٸز, – دەدٸ قاسىم-جومارت توقاەۆ.
«SANA» جاڭا ۇرپاق ورتالىعىن «Damu Development Group» كونسورتسيۋمى بيزنەستٸڭ ەلەۋمەتتٸك جاۋاپكەرشٸلٸگٸ اياسىندا سالعان. كومپانييا قۇرىلتايشىسى ابزال ساعىمباەۆ الداعى ۋاقىتتا بٸرنەشە دامىتۋ ورتالىقتارىن, ەلەۋمەتتٸك, دەنساۋلىق ساقتاۋ نىساندارىن سالۋ جوسپارلانىپ وتىرعانىن جەتكٸزدٸ.
استانا قالاسىنىڭ ەكٸمٸ جەڭٸس قاسىمبەكتٸڭ ايتۋىنشا, 2029 جىلعا دەيٸن ەلوردادا وسىنداي 15 وقۋشىلار سارايى بوي كٶتەرەدٸ. ونىڭ ٸشٸندە 5 ورتالىقتىڭ قۇرىلىسى جۋىق ارادا باستالادى.
